Биллэрин курдук, итирик киһи туохха баҕарар түбэһиэн, киирэн биэриэн, буруйу оҥоруу сиэртибэтэ буолуон сөп.
Вера МАКАРОВА, «Саха сирэ» хаһыат, https://edersaas.ru/
Ордук чуолаан, саататар-аралдьытар тэрээһиннэргэ, түүҥҥү кулууптарга, эрэстэрээннэргэ сылдьан баран, харчытын, төлөпүөнүн, сыаналаах малын умнубут, сүтэрбит, уордарбыт баар буолааччы. Муусука алыптаах долгунугар уйдаран, итирдэр утах сылаас дьайыытыгар бигэнэн, тулата барыта киэркэйбит кэмигэр киһи сэрэҕин сүтэрэрэ — баар суол бөҕө буоллаҕа.
Ол курдук, СӨ ИДьМ-тын пресс-сулууспата иһитиннэрбитинэн, үс итинник түбэлтэ тахсыбытыттан, иккитэ «сылааһына» арылынна.
24 саастаах кыыс куорат биир эрэстэрээнигэр суотабай төлөпүөнүн уордарбытын туһунан полицияҕа тыллаабыт. Кыыс аһара элбэх арыгы иһэн, кинини кытта биир остуолга олорбут киһини кыайан ойуулаан биэрбэтэх, олох өйдөөбөт үһү. Ол да буоллар, оперативниктар уорбаланааччыны туппуттар — түптээн олорор сирэ-уота, дьиэтэ суох, урут талааһыҥҥа түбэһэн сууттана сылдьыбыт киһи эбит. Уоруйаҕы автовокзал таһыттан туппуттар.
Итиниэхэ маарынныыр түбэлтэ Маҕанныыр суолга турар кафеҕа түүн буолбут. Суһал-силиэстийэлиир бөлөх онно тиийбитигэр, итирэн хаалбыт дьахтар аттынааҕы остуолга олорор кыргыттары ыйбыт, кинилэр уорбуттара буолуо диэн. Ол эрэн, уопуттаах оперативниктар дьиҥнээх уорбаланааччыны ир суолун ирдээн, тоҥ суолун тордоон туппуттар — 22 саастаах омук киһитэ эбит.
Үһүс быһылаан эмиэ эрэстэрээҥҥэ буолбут. Бу сырыыга 22 саастаах кыыс 60 тыһ. солк. сыаналаах «Айфон» төлөпүөнүн остуолга ууран баран, онно-манна аралдьыйан, хайа эрэ түгэҥҥэ онтун умнан кэбиспит. Билигин бу чахчынан процессуальнай бэрэбиэркэ бара турар. Уорбаланааччыны көрдүүллэр.
Полиция сэрэтэр: уопсастыбаннай, элбэх киһи тоҕуоруһар сирдэригэр тус малгытын дьон хараҕар быраҕыллар гына уурумаҥ, көрдөрүмэҥ. Кыргыттар, дьахталлар, суумкаҕытын, төлөпүөҥҥүтүн саҥа билсибит киһигитигэр итэҕэйэн туттарымаҥ, биэримэҥ. Сэргэх мөссүөн — бөрөстүүпүнньүк мааската буолуон сөп.
Вера МАКАРОВА, «Саха сирэ» хаһыат,https://edersaas.ru/
Хаартыска: интернеттэн.