Кыстатыамнар күн уотунан «уоттаныахтара»

Бөлөххө киир:

Бу сылга Өймөкөөн Орто Балаҕаныгар (Сордоҥноох) 50 кВт кыамталаах, Кэбээйи Сэбээн Күөлүгэр 50 кВт уонна Эдьигээн Кыстатыамыгар 40 кВт кыамталаах станциялар тутуллуохтаахтар.

edersaas.ru


Энергетиктэр сыаналаах уматыкка ороскуотурбат уонна электроэнергия сыанатын намтатар сыалтан, аҕыйах сылтан бэттэх, сөргүтүллэр энергетиканы сайыннарыыга үлэлэһэллэр. Биһиги өрөспүүбүлүкэбит килиимэтин учуоттаан, күн итиитин хас да сылы быһа үөрэтэн баран, «Сахаэнерго» ПАУо 2011 сыллаахха Кэбээйи Батамайыгар күн күүһүнэн үлэлиир бастакы станцияны үлэҕэ киллэрэн, быйыл кыамтатын улаатыннарыахтаахтарын туһунан «Сахаэнерго» генеральнай дириэктэрин инновацияҕа солбуйааччыта Александр Корякин иһитиннэрдэ.

Икки сыллааҕыта Дьааҥы улууһун Баатаҕай бөһүөлэгэр 1 мегаватт кыамталаах сүүнэ улахан станция тутуллан үлэҕэ киллэриллибитэ. Хотугу эргимтэ тыйыс тымныы усулуобуйатыгар бу собус-соҕотох баараҕай суолталаах тутуу буоларынан, оннооҕор Гиннес рекордун кинигэтигэр киллэриллибитэ. Билигин номнуо айылҕа көмөтүнэн электроэнергияны оҥорон таһаарар 16 станция таһаарыылаахтык үлэлии турар.

Кэлэр нэдиэлэҕэ Дьокуускай куоракка «Уһук Илиҥҥэ сөргүтүллэр энергетиканы сайыннарыы» аан дойдутааҕы кэмпириэнсийэ бэһис төгүлүн ыытыллыаҕа. Дьоһун суолталаах тэрээһиҥҥэ Россияттан уонна тас дойдулартан уопсайа 350 делегат кыттара күүтүллэр.

Анивера АКИМОВА, «Саха сирэ» хаһыат, edersaas.ru

Хаартыска: «Якутскэнерго» ПАУо пресс-сулууспата.

+1
0
+1
0
+1
0
+1
0
+1
0
+1
0
+1
0