Бу күннэргэ Кытай Пекин куоратыттан Кунцю опера тыйаатыра ыалдьыттыы кэллэ. Ыраахтан кэлбит ыалдьыттар бөдөҥ судаарыстыбаннай диэйэтэл, саха литературатын төрүттээччи, учуонай Былатыан Ойуунускай төрөөбүтэ 125 сылынан, кини олоҥхотунан испэктээк туруорбуттар.
Ыраахтан кэлбит ыалдьыттары кытары көрсүһүүгэ Кунцю опера Пекиннээҕи тыйаатырын дириэктэрэ Ян Фэнг И, толорооччу дириэктэр Цао Инь, СӨ Судаарыстыбаннай Сүбэһитэ Андрей Борисов, уо.д.а. кытыннылар.
Пекиҥҥэ 500 сыллааҕыта тэриллибит уонна күн бүгүҥҥэ диэри былыргы үгэһи иҥэринэн, тутан илдьэ сылдьар кырдьаҕас тыйаатыртан 49 буолан кэлбиттэр. Итиэннэ бэҕэһээ «Триумф» СК улуу Ойуунускай 125 сылыгар анаммыт өрөгөйдөөх дьоро киэһэҕэ кыттыбыттар. Сэтинньи 14-15 күннэригэр Д.К.Сивцев-Суорун Омоллоон аатынан опера уонна балет тыйаатырыгар Кунцю опера тыйаатыра «Туйаарыма Куо» туруоруутун саха дьонун-сэргэтин киэҥ дьүүлүгэр таһаарыахтаах. Ол кэнниттэн Санкт-Петербург куоракка норуоттар икки ардыларынааҕы VII-с форумҥа, салгыы Москваҕа норуоттар икки ардыларынааҕы муусука дьиэтигэр бу ураты туруорууларын көрдөрүөхтэрэ.
Ян Фэнг И Олоҥхо тыйаатырын кытары ыкса тутуһан үлэлииллэриттэн, кыттыгас бырайыактардаахтарыттан үөрэр. Андрей Борисовка үлэлэригэр элбэх сүбэтин-аматын, көмөтүн иһин махтанар. «Туйаарыма Куо» уонна кытай былыргы номоҕо «Пионовая беседка» сүрүн дьоруойдарын дьылҕалара, Ийэ сиргэ дьиҥ тапталы өрө туталлара, олох иһин охсуһаллара майгылаһалларын бэлиэтээтэ. Бу улахан айымньыны олус сэҥээрбитин, ол иһин ылсыбытын эттэ. 2020 сылга диэри өссө биир улахан айымньыны туруорар баҕалаахтарын иһитиннэрдэ. Тылбааска Кытай университеттарыттан профессордара көмөлөспүттэрин, дойдулаахтара сэргии, сэҥээрэ көрбүттэрин киэн тутта эттэ.
Цао Инь СӨ култуура уонна духуобунай сайдыы министиэристибэтин кытары ыкса үлэлэспиттэрэ сэттэ сыл буолбутун бэлиэтээтэ. Кини кэпсээбитинэн, бу сыллар усталарыгар үлэлэригэр элбэҕи ситиспиттэр, бырайыактарын олоххо киллэрбиттэр. Маныаха хайа да өртүттэн, инникитин да хардарыта сибээһи чиҥэтэр, күүскэ үлэлэһэр баҕалаахтар. Онон, былыргы үйэлэри уҥуордаабыт олоҥхобутун көрдөрөр тыйаатырбыт уонна суон сурахтаах Кытай Кунцю опера тыйаатырын алтыһыылара мээнэҕэ буолбатаҕар эрэниэҕиҥ. Ол аата уратыны, дьиктини, долгутар кэрэни көрдөрүөхтэрэ турдаҕа.
Түмүккэ, бу күннэргэ ытык Ойуунускайбыт сүдү айымньыта кытайдыы саҥарыа. Атын омук олоҥхону көрүүтүн бар дьоммут сыаналыа.
Сардаана БАСНАЕВА, «Саха сирэ» хаһыат, edersaas.ru
Хаартыска СИА ылылынна