Бэҕэһээ, кулун тутар 5 күнүгэр, Уус Алдан улууһун “Лөгөй нэһилиэгэ” муниципальнай тэриллии баһылыгын болдьоҕун иннинэ куоластааһына буолла.
Роман Попов, “Саха сирэ” хаһыат, https://edersaas.ru
Киирбит бүлүтүөннэри ааҕыынан, күрэстэһээччилэрин ырааҕынан хаалларан “Биир ньыгыл Арассыыйа” баартыйа чилиэнэ Марк Васильевич Местников баһылыгынан талылынна.
Санатар буоллахха, баартыйа олохтоох тэрилтэтэ б. дь. тохсунньу 17 күнүгэр тэрийэн ыыппыт барыллааһын куоластааһыныгар кини кыйыылааҕынан тахсан, баһылык болдьоҕун иннинэ быыбарыгар кыттарга мэктиэлэммитэ.
Ааспыт өрөбүлгэ буолбут быыбарга нэһилиэк 783 олохтооҕо кэлэн кытынна. Куоластааһын түмүгэ маннык буолла: Марк МЕСТНИКОВ иһин 515 (65,77%) киһи куоластаата. Рихард ОЛЕСОВ иһин – 141 (18,01%), Иннокентий КОЛЕСОВ иһин – 118 (15,07%), Арсений КОЛОДЕЗНИКОВ иһин– 5 (0,64%), Степан ТЕРЕХОВ – иһин 1 (0,13%) куолас киирдэ. Икки киһи (0,26%) хандьыдааттары барыларын утарарын биллэрдэ.
Ыспыраапка
МЕСТНИКОВ Марк Васильевич
1979 сыл атырдьах ыйын 17 күнүгэр төрөөбүтэ. Үрдүк үөрэхтээх. “Биир ньыгыл Арассыыйа” баартыйа чилиэнэ.
2001-2004 сс. – Уус Алдан улууһун Кэптэни сэлиэнньэтигэр Саха-Бельгийскай гимназия дириэктэрин иитэр үлэҕэ солбуйааччыта.
2004-2016 сс. – “Туймаада-Лизинг” хампаанньаҕа сүрүн исписэлииһинэн, отдел салайааччытынан, упарвление начальнигын солбуйааччынан үлэлээбитэ.
2016 сылтан “Саха-Техресурс” ХЭУо дириэктэрэ.