Соторутааҕыта Өлүөхүмэ улууһун экологическэй хайысхалаах «Сомоҕо күүс» уопсастыбаннай тэрилтэтин актыбыыстара Чайдаах диэн сиргэ тиийэ сылдьан, промышленнай тобохтор хомуллубакка сыталларын хаартыскаҕа түһэрэн, социальнай ситимҥэ тарҕаппыттара. Дьэ, кырдьык, ыһыллан-тоҕуллан бэрдэ суох хартыына.
Александр ТАРАСОВ, «Саха сирэ» хаһыат, https://edersaas.ru
2016 сыл муус устар 26 күнүгэр Өлүөхүмэтээҕи айылҕа харыстабылын кэмитиэтин иниспиэктэрдэрэ С.А.Суханов, В.А. Филиппов уонна I Нөөрүктээйи нэһилиэгин баһылыга А.Н. Сольжиграсов буолан, «ТНГ-СЕРВИС» ХЭУо Чайдаах диэн учаастакка промышленнай үлэни ыыппытын бэрэбиэркэлээбиттэрэ. Онно айылҕаны киртитии таһаарыллыбыта биллибитэ. Көҥүлэ суох сиргэ оҥорон таһаарыыга туһаныллыбыт тобохтору быраҕар сыбаалка үөскээбитэ быһаарыллыбыта. Итинэн сиэттэрэн, тута «ТНГ-СЕРВИС» ХЭУо генеральнай дириэктэрин эбээһинэһин быстах кэмҥэ толорооччу А.В. Пудов аатыгар промышленнай тобохтору хомуйарга аах оҥоһуллубута. Ити кэнниттэн 2016 сыл балаҕан ыйыгар хаттаан тахсан бэрэбиэркэлээбиттэрэ. Ол түмүгэр «ТНГ-Сервис» генеральнай дириэктэрэ А.В.Пудов административнай эппиэтинэскэ тардыллан, 20 тыһ.солк ыстарааптаммыта уонна баар сыыһаны туоратарга дьаһал ылыллыбыта. Итинник бэрэбиэркэлэр кэнниттэн тустаах хампаанньа баччааҥҥа диэри промышленнай тобохтору хомуйа илигэ сөхтөрөр эрэ.
СӨ айылҕа харыстабылын миниистэрэ Сахамин Афанасьев атырдьах ыйын 1 күнүгэр Чайдаах учаастагар анал бэрэбиэркэ буолуо диэн эттэ. Онон ол бэрэбиэркэни күүтэбит.