close
«Өлүөхүмэ кыладабыайыгар» 3 тыһыынчаттан тахсалыы киилэ үүтү ыатылар...
Олох-дьаһах - Тыа сирэ

«Өлүөхүмэ кыладабыайыгар» 3 тыһыынчаттан тахсалыы киилэ үүтү ыатылар

“Туймаада” ҮХАПХ АУо салалтата бэҕэһээ, сэтинньи 7 күнүгэр, Өлүөхүмэ улууһугар тиийэн үлэлээтэ. Соторутааҕыта хампаанньа генеральнай дириэктэринэн анаммыт Петр Ефремов баһылыктаах бөлөх улуус дьаһалтатыгар мунньахтаан, бииргэ үлэлииргэ түһэрсиллибит сөбүлэһии туолуутун дьүүллэстэ. Онтон “Өлүөхүмэ кыладабыайа” ХЭУо үлэтин-хамнаһын билистэ.


Хаҥастан уҥа: Өлүөхүмэ улууһун баһылыга Виктор Васильев уонна «Туймаада» хампаанньа генеральнай дириэктэрэ Петр Ефремов

 

Бу хаһаайыстыбаҕа б.дь. алтынньы ыйыгар “Анаабыр алмаастара” хампаанньа оннугар  “Туймаада” ҮХАПХ АУо тэрийээччинэн буолбута. “Өлүөхүмэ кыладабыайа” ХЭУо генеральнай дириэктэрэ Николай Ефимов-Владимиров билиһиннэрэринэн, 300-тэн тахса ынаҕы ыыллар, 10 ый түмүгүнэн биир ынахтан ортотунан 3 тыһ. тахсалыы киилэ үүтү ыабыттар. Ыанньык ахсаанын 400-кэ тириэрдэр дьүккүөрдээхтэр. Үүтү таһынан 2018 сыл түмүгэр 16 туонна эти оҥоруохтара, ол эбэтэр 135 төбө сүөһүнү идэһэҕэ туттуохтара.

Уҥаттан хаҥас: Петр Ефремов уонна кини солбуйааччыта Александр Артемьев «Өлүөхүмэ кыладабыайа» ХЭУо сүөһүнү иитиигэ салаатын начаалынньыга Сергей уонна  кылаабынай зоотехник Светлана Несмеловтары кытта

 

 

«Туймаада» хампаанньа оробуочай бөлөҕө «Өлүөхүмэ кыладабыайа» хаһаайыстыба аппараатын кытта. Ортоку — ХЭУо салайааччыта Николай Ефимов-Владимиров

 

Өлүөхүмэ сырынан аатырар. Манна сылга 43 туонна сыры астыыллар. Николай Александрович этэринэн, ити кээмэй Өлүөхүмэни даҕаны хааччыйар кыаҕа суох, чугастааҕы сылларга 100 туоннаттан таһааран, Дьокуускайга тиийэ киэҥник тарҕатарга торумнууллар. Бу таһымы хайдах ситиһиэхтэрэй? Алтынньы 25 күнүттэн үүттэн астыыр сыахтарын үлэтин тохтотон, дьиэтин өрөмүөннүүргэ туруммуттар. Өссө, кыалыннаҕына, аны саас оборудованиетын аныгыга уларытыахтара. Сыах 14 сыл тохтообокко, ньиргиччи үлэлээн кэллэ. Ол тухары дьиэтэ-уота айгыраата, тэрилэ эргэрдэ. Хаһаайыстыба саҥалыы сөргүтүнэригэр “Туймаада” хампаанньа көмөлөһөргө бэлэм.

Василий НИКИФОРОВ, «Саха сирэ» хаһыат, edersaas.ru

#бүгүн: 1
1
0

Сайт матырыйаалларын ааптар көҥүлэ суох ылар бобуллар.