2013 сылтан ыла от ыйын 2 күнүгэр Саха сиригэр Өлүөнэ өрүс күнэ бэлиэтэнэр. Быйыл үгэс быһыытынан өрөспүүбүлүкэ үрдүнэн араас экологическай аахысыйалар ыытыллыахтара уонна Дьокуускай куорат Ленин болуоссатыгар «Өлүөнэ өрүс – Саха сирин киэн туттуута» диэн тэрээһин буолуо.
Аан дойду бары өрүстэриттэн уһунунан 10-11-с (дьон араастаан ааҕар), Арассыыйаҕа 3-с миэстэлээх, сүрдээх кэтит, толору уулаах, баай балыктаах, кэрэ очуос киэргэтиилээх, элбэх хоннохтоох-быттыктаах, 6 сүрүн портаах, сүүнэ ирбэт тоҥ үрдүнэн сүүрэр өрүспүт — иһэр уубут, аһыыр аспыт, суолбут-ииспит буолар. Дэлэҕэ Саха сирин хорук тымыра диэн ааттаныа дуо?
«Лена волнуется раз!» диэн халлаан күөх таҥастаах уонна саарык тутуурдаах ыччат флешмоба, уу туругун кэтииргэ уонна бэрэбиэркэлииргэ үөрэтэр мастер-кылаас, «Я рисую Лену» диэн аспаалга уруһуй күрэһэ, Өлүөнэ өрүс туһунан ыйытыктаах квест-оонньуу,, уо.д.а. тэриллэрэ күүтүллэр. Сиһилии Экология, айылҕа харыстабылын уонна ойуур хаһаайыстыбатын министиэристибэтин саайтыгар билсиэххэ сөп.
Ону таһынан ол күн 4 чаастан Даркылаах кыһыҥҥы туоруур сирин аттыгар «Чистый берег» диэн суббуотунньук буолуоҕа. Баҕалаах дьон бөх-сыыс хомуйуутугар, Өлүөнэ өрүс ыраас хааларын туһугар, көхтөөх кыттыыны ыларгытын көрдөһөбүт.
Света ИВАНОВА, «Саха сирэ» хаһыат, edersaas.ru