Таба ииттэр хаһаайыстыбалар сылга иккитэ (сааскы төрүөх кэнниттэн итиэннэ күһүн баччаларга, ыстаадалар сайылаабыт сирдэриттэн кыстыктарыгар киириилэрэ) харааллааһыны ыыталлар, ол эбэтэр табаларын түмэн ааҕаллар, саастарынан уонна аналларынан наардаан араараллар итиэннэ эмтиир-сэрэтэр дьаһаллары тэрийэллэр.
Бу үлэҕэ табаһыттар эрэ буолбакка, ыстаада бары үлэһиттэрэ, улуустааҕы бэтэринээринэй сулууспа уонна тыа хаһаайыстыбатын управлениетын исписэлиистэрэ тардыллаллар. Үгэс курдук, туундара зонатын хаһаайыстыбалара хараалы эрдэ саҕалыыллар. Өлөөн эбэҥки национальнай оройуонугар “Өлөөн” уонна “Дьилиндэ” муниципальнай-унитарнай тэрилтэлэр табаларын балаҕан ыйыгар аахтылар. Бэтэринээрдэр ыстаадаларга барыларыгар сылдьан, Сибиир дьааспатын, бруцеллез, ииригирии, некробактериоз курдук ыарыылары сэрэтэр быһыылары биэрдилэр, бруцеллезка серологическай чинчийии оҥордулар, РБП (роз-бенгал) ньыматынан боруоба ыллылар, табалары имнээтилэр, бииркэлээтилэр.
Тыһыынчанан үөрдээх табаны ааҕыы, наардааһын уонна хас биирдиилэрин маамыктанан тутан укуоллааһын, хаан анаалыһын ылыы элбэх киһини эрэйэр үлэ. Итини өйдөөн Дьокуускайдааҕы тыа хаһаайыстыбатын техникумун салалтата хараалга көмөҕө устудьуоннары ыытар. Быйыл техникум иккис куурсун устудьуона А.Егоров атырдьах ыйын 15 күнүттэн балаҕан ыйын 30 күнүгэр диэри бэтэринээрийэ улуустааҕы департаменыгар практикаланна. Уопуттаах бэтэринээрдэри В.М.Дмитриевы, Н.Г.Маймаганы кытары хараалга сылдьан табаны имнээһин, таба уопсай туругун көрүү-истии, эмтээһин, хаан ылыытын ньымаларыгар үөрэннэ.
Ыстаадалар хараалы түмүктээн, табаларын чуолкайдаатылар, наардаатылар. Билигин кыһыҥҥы маршруттарын чопчулаан-быһаарсан, аһыҥастаах кыыллары утары үлэни өссө күүһүрдэн, табаны энчирэппэт туһугар сыал-сорук туруорунан үлэлии-хамсыы сылдьаллар. Бу туһунан биһиэхэ Өлөөннөөҕү ветеринарнай управление начааньыга Анжелика Николаева иһитиннэрдэ.
Хаартыскаларга хараал кэмигэр:
Раиса Сибирякова, “Саха сирэ” хаһыат, edersaas.ru