Уһук хоту сытар улуус табаны иитиигэ идэтийэр хаһаайыстыбалара, «Өлөөн» уонна «Дьэлиндэ» муниципальнай унитарнай тэрилтэлэр, сааскы хараалы өссө олунньу бүтүүтүттэн саҕалаабыттара.
Бу кэм устата ыстаадалар табаларын түмэн аахтылар, саастарынан уонна аналларынан наардаан араардылар, зоотехническэй, селекциялыыр итиэннэ эмтиир-сэрэтэр дьаһаллары тэрийдилэр. Онон хараалга табаһыттар эрэ буолбакка, ыстаада бары үлэһиттэрэ уонна улуустааҕы бэтэринээринэй сулууспа, тыа хаһаайыстыбатын управлениетын исписэлиистэрэ үлэлээтилэр. Бэтэринээрдэр ыстаадаларга барыларыгар сылдьан, Сибиир дьааспатын, бруцеллез, ииригирии, некробактериоз курдук ыарыылары сэрэтэр быһыылары биэрдилэр, бруцеллезка серологическай чинчийии оҥордулар, РБП (роз-бенгал) ньыматынан боруоба ыллылар, табалары имнээтилэр, бииркэлээтилэр.
Улуус үрдүнэн Сибиир дьааспатыттан өлбүт таба көмүллүбүт 19 сирэ баар. Уодаһыннаах ыарыы бактериятын споралара сүүс сылга тиийэ дьайар кыахтаахтар, инньэ гынан хаһаайыстыбалар итиэннэ бэтиринээрдэр сэрэтэр дьаһаллары тэрийиигэ улахан болҕомтолорун уураллар. Ол түмүгэр, кэлиҥҥи 40 сыл устата улууска Сибиир дьааспата тура илик. Сыл саҕаланыаҕыттан ити ыарыыны утары быһыы 3 тыһ. 691 табаҕа, 81 ынах сүөһүгэ бэрилиннэ.
Ииримтийэр ыарыы сүрүннээн бөрөттөн тарҕанар буолан, ити кыыллары утары охсуһуу тохтообот, билиҥҥитэ үс бөрө сууһарылынна. Бу туһунан биһиэхэ Өлөөн улууһун бэтэринээрийэҕэ управлениетын начальнига Анжелика Вениаминовна Николаева иһитиннэрдэ.
Раиса СИБИРЯКОВА, “Саха сирэ”, edersaas.ru