Бүгүн СӨ Тас сибээскэ департаменын салайааччы Владимир Васильев суруналыыстарга аан дойдутааҕы таһымнаах организациялары кытта үлэлэрин сырдатта. Ордук чорботон ЮНЕСКО, Арктическай сэбиэт, Хотугу форум тэрилтэлэрин кытары ыкса сибээстээхтик, таһаарыылаахтык үлэлииллэрин бэлиэтээтэ.
Владимир Николаевич быйылгыттан Хотугулуу Илиҥҥи Азия дойдуларын регионнааҕы администрацияларын ассоциациятын (АРАССВА) кытта үлэни салгыырга итиэннэ тэтимирдэргэ бэлэмнэнэллэрин, бу тэрилтэҕэ бэрэссэдээтэллииргэ былырыын сайаапка (Саха сирэ уонна Магадан уобалаһа сайаапкаламмыттар) түһэрбиттэрин эттэ. Быһаарыы быйыл Хунань провинциятыгар (КНР) АРАССВА 12-с Генеральнай Ассамблеятыгар ылыллыахтаах. Манна даҕатан эттэххэ, АРАССВА-ҕа РФ регионнарыттан Хабаровскай кыраай (2000-2002 сс.), Иркутскай уобалас (2014-2016 сс.) бэрэссэдээтэллээбиттэр.
—Өскөтүн биһигини таллахтарына, бэйэбит бачыымнарбытын, экономика, култуура, үөрэхтээһин хайысхаларыгар сыһыаннаах үчүгэй бырайыактарбытын улахан таһымҥа таһаарарга үлэлэһиэхтээхпит, — диир Владимир Николаевич. Итиэннэ 2020 сылга Монголияҕа Улан Баторга ыытыллар “Азия оҕолоро” оонньуулары эрдэттэн улаханнык сырдатар, билиһиннэрэр соруктаахтарын иһитиннэрдэ.
Владимир Николаевич маны сэргэ бу күннэргэ Финляднияҕа Арктика Сэбиэтин салайааччыларын сүбэ мунньаҕа буола турарын эттэ. Онно Саха сирэ “Арктика оҕолоро” бырайыагы билиһиннэрэр. Бырайыакка Арктика талааннаах, дьоҕурдаах оҕолорун өйүүр киини тэрийэр туһунан этиллэр. Онтон күһүн Арктика Сэбиэтигэр департамент норуоттар икки ардыларынааҕы Арктика оскуолатын туһунан бырайыагын өссө төгүл бигэргэтэн билиһиннэриэхтээх.
Департамент салайааччыта ЮНЕСКО генеральнай дириэктэрэ Ирина Бокова кэлэ сылдьыбыта улахан суолталаах буолбутун, хардарыта ыкса сибээстээхтик үлэлииргэ үһүс сөбүлэҥҥэ илии баттаныллыбыт тоһоҕолоон эттэ. Онон геопарк, “Кыталык” резерват тэриллиитэ, “Арктика оҕолоро” киин, норуоттар икки ардыларынааҕы Акртика оскуолатын курдук улахан бырайыактар өйөбүлү ылыахтарыгар эрэнэрин биллэрдэ.
Далааһыннаах үлэни чиҥэтэр сыалтан сэтинньигэ ЮНЕСКО саҥа генеральнай дириэктэрин кытта көрсүһүү былааннаныллыбыт. Онно департамент далааһыннаах үлэтин, былаанын сиһилии билиһиннэрэр, сөбүлэҥ чэрчитинэн үлэни-хамнаһы сүбэлэһэр былааннаахтар.
Биһиги корр., “Саха сирэ” хаһыат, edersaas.ru