«Үлэҕэ-хамнаска түмсүүлээх буолууну маннык түһүлгэлэр илэ-чахчы кэрэһилииллэр»
От ыйын 6 күнүгэр,Үөһээ Бүлүүгэ сахалыы төрүт оонньууларга сүүрбэһис үбүлүөйдээх Манчаары Баһылай оонньуулара үөрүүлээхтик арылыннылар.
Тэрээһиҥҥэ кыттыыны ылбыт Саха Өрөспүүбүлүкэтин Ил Дархана Егор Борисов манна, Үөһээ Бүлүүгэ сырыттаҕына, киниэхэ Арассыыйа Федерациятын бэрэсидьиэнэ Владимир Путин төлөпүөнүнэн эрийбитин уонна бу бэртээхэй спорт бырааһынньыгынан Саха сирин норуоттарыгар эҕэрдэтин тиэрдибитин, төрөөбүт өрөспүүбүлүкэбит туһугар саҥа ситиһиилэри баҕарбытын иһитиннэрбитин «Үс Хоһуун» стадиоҥҥа мустубут дьон дохсун ытыс тыаһынан уруйдуу көрүстүлэр.
«Күндү сахам дьоно! Күндү Үөһээ Бүлүү олохтоохторо, ыччаттара, бэтэрээннэрэ, үлэһит дьоно! Мин бүгүн маннык үтүө бырааһынньыгы тэрийбиккитинэн Саха Өрөспүүбүлүкэтин салалтатын аатыттан итиитик-истиҥник эҕэрдэлээн, сөҕөн-махтайан туран, махтанабын. Өрөспүүбүлүкэбитигэр үлэҕэ-хамнаска түмсүүлээх буолууну маннык түһүлгэлэр илэ-чахчы көрдөрөллөр, — диэтэ Егор Борисов.
Салгыы Ил Дархан Үөһээ Бүлүү олохтоохторо өрөспүүбүлүкэ өйөбүлүн табатык туһанан, Манчаары оонньуулара норуоту түмэр суолтатын өйдөөн, тэрээһин тула түмсэн, улахан үлэни ыыппыттарын бэлиэтээтэ. Дьон-сэргэ түмсүүлээҕэ инникитин улууһу сайыннарыыга төһүү буолуоҕун тоһоҕолоото.
Этиитин түмүгэр Егор Афанасьевич үөһээ-бүлүүлэргэ түмсүүлээх, көхтөөх үлэнэн улахан ситиһиилэммиттэринэн итиитик-истиҥник эҕэрдэлээтэ, дьолу-соргуну баҕарда.
Роман Попов, «Саха сирэ» хаһыат, edersaas.ru
Андрей Сорокин (СИА) хаартыскаҕа түһэриитэ.