Быйыл Амма улууһун потребительскай кэпэрээссийэтэ 100 сылын туолла. Оройуон потребуопсастыбатын үлэтэ үгэннээн турар кэмигэр үлэһитин ахсаана 700-чэ киһиэхэ тиийбитэ.
Манна Гаврильевтар, Тимофеевтар, Барабановтар, Яковлевтар, Пахомовтар, Фоминнар, Ильиннэр, Басыровтар, Ларионовтар, Устиновтар, Скрыбыкиннар, Федотовтар, Куприяновтар, Акимовтар, Неустроевтар, Никифоровтар, Пахомовтар, Слепцовтар үлэһит династиялара тахсыылаахтык үлэлээбиттэрэ. Тэрилтэни отучча сыл Иван Петрович Корякин салайан, “Амма” ПО “Холбоско” бастыҥнар кэккэлэригэр сылдьыбыта.
Бүгүн Амма потребительскай кэпэрээссийэтэ “Колос” диэн тэрилтэлээх (дир. А.Носов). “Колос” 2008 сылтан көрдөрүүлэрин тупсарар, улуус үс гыммыт биирин хааччыйар, 8 маҕаһыыннаах, Амма сэлиэнньэтигэр килиэп кэмбинээтин, Михайловкаҕа бэкээринэни үлэлэтэр. Тэрилтэ бэйэтин күүһүнэн Михайловкаҕа бэкээринэни уонна маҕаһыыны тутта. Кэлэр сылга оройуон киинигэр 4-с №-дээх маҕаһыыны хапытаалынайдык өрөмүөннүөхтэрэ. Килиэп кэмбинээтэ сылга 765-780 туонна килиэби астыыр. Үлэҕэ ситиһиилэрин иһин быйыл Амматааҕы килиэп кэмбинээтэ Саха Өрөспүүбүлүкэтин Ил Дарханын махталын туппута.
Тэрилтэ автопааркатын саҥардан, тыа нэһилиэктэригэр табаары кэмигэр таһыы-тиэйии ситиһиллэр.
Биэкэрдэр уонна кондитердар Матрена Пестерева, Алена Заборовская, Виктория Шушкова уо.д.а. дьон махталын ылаллар.
Николай КСЕНОФОНТОВ, “Амма” потребительскай уопсастыба бэрэссэдээтэлэ. Амма.
«Саха сирэ» хаһыат, edersaas.ru саайтка анаан