“Үлэ – чиэс, үлэ – албан аат” диэн урукку сыллар луоһуннара саҥалыы тыыннанан иһиллэр. Норуот дьокутааттара биллиилээх табаһыт Дмитрий Туприны чиэстээтилэр.
Раиса СИБИРЯКОВА, “Саха сирэ” хаһыат, edersaas.ru
Анаабыр улууһун Үрүҥ Хайа бөһүөлэгин олохтооҕо Дмитрий Константинович Туприн сааһын тухары таба иитиитигэр таһаарыылаахтык үлэлээбитэ. Сопхуос саҕана үрдүк көрдөрүүлэри ситиһэн, Ленин уонна үһүс истиэпэннээх Үлэ Албан аата уордьаннарынан наҕараадаламмыта, тыа хаһаайыстыбатын үтүөлээх үлэһитэ буолбута. Бочуоттаах сынньалаҥҥа тахсан баран кырдьаҕас табаһыт төрүт дьарыгыттан тэйбэтэҕэ, Социалистическай Үлэ Дьоруойа Илья Спиридонов аатынан МУП-ка настаабынньык буолбута, элбэх эдэр ыччаты таба иитиитин кистэлэҥнэригэр уһуйбута.
2010 с. Үрүҥ Хайаҕа тэриллибит Аан Дойду табаһыттарын сугулааныгар Дмитрий Константинович таба ахсаанын элбэтэр, үлэни-хамнаһы төрдүттэн тупсарар туһугар ыстааданы кытары көһө сылдьан үлэлиир дьиэ кэргэн көмүскэлин тэрийэр сокуону ырытан оҥорорго этии киллэрбитэ. Ол этии ылыллан, Ил Түмэн “Көс дьиэ кэргэн” сокуону бигэргэппитэ.
Билигин Спиридонов аатынан МУТ-ҕэ Дмитрий Константинович ыччаттара, уола Роман 7 №-дээх ыстаадаҕа биригэдьиирдиир, икки сиэн хаһаайыстыбаҕа үлэлииллэр. Соторутааҕыта 80 сааһын туолбут кырдьаҕас табаһыты Ил Түмэн дьокутааттара истиҥник эҕэрдэлээтилэр.
Раиса СИБИРЯКОВА, “Саха сирэ” хаһыат, edersaas.ru