Бэҕэһээ киэһэ Өксөкүлээх Өлөксөй аатынан Култуура киинигэр чулуу ыанньыксыт, Үлэ Албан аатын 3 истиэпэнин уонна “Хотугу сулус” уордьаннар кавалердара, Саха Өрөспүүбүлүкэтин норуотун хаһаайыстыбатын үтүөлээх үлэһитэ Владимир Африканович Михайловы 65 сааһынан чиэстээһин тэрилиннэ. 48 сыл устата ыанньыксытынан таһаарыылаахтык үлэлии-хамсыы сылдьар үбүлээри өрөспүүбүлүкэ бөдөҥ тэрилтэлэрин, хаһаайыстыбаларын салайааччылара, уопсастыбаннас уонна улуустар дэлэгээссийэлэрэ эҕэрдэлээтилэр.
— Билигин хомойуох иһин, үлэ киһитигэр болҕомто ахсаабыт кэмигэр, үлэҕэ үрдүк көрдөрүүлэри аныгы ыччат билэрин, бастыҥ дьонунан киэн туттарын, кинилэри холобур оҥосторун ситиһиэх тустаахпыт. Өрөспүүбүлүкэ парламенын аатыттан, ытыктабыллаах Владимир Африканович, эн бэйэҥ үлэҕинэн-хамнаскынан, олоххо сыһыаҥҥынан эдэр ыччакка холобур буола тураргар баҕарабыт, — диэтэ Ил Түмэн спикерэ Петр Гоголев уонна норуот дьокутааттарын аатыттан “Эҕэрдэ суругу” туттарда.
Тыа хаһаайыстыбатын миниистирэ Александр Атласов чулуу ыанньыксыт Владимир Африканович олоҕун, үлэтин-хамнаһын үрдүктүк сыаналаан туран, киниэхэ Ил Дархан Махтал суругун, министиэристибэ эҕэрдэтин итиэннэ ВАЗ-2121 «Нива» массыына сертификатын туттарда.
— Олус долгуйдум уонна миигин, ыраах тыаттан кэлбит үлэ киһитин чиэстээбиккитигэр, үрдүктүк туппуккутугар махтанабын, — диэтэ Владимир Африканович.
Бу күн үбүлээр биир идэлээхтэрэ, бастыҥ ыанньыксыттар умнуллубатылар. Ол курдук, “Тумул” кэпэрэтиип ыанньыксыта Саргылаана Елисеева (Мэҥэ Хаҥалас) “СӨ АПК-тын бочуоттаах үлэһитэ” аатынан, М.Егоров аатынан ХЭУо ыанньыксыта Лена Апросимова, “Хорообут” ХЭУо ыанньыксыта Петр Потапов (Мэҥэ Хаҥалас), “Баҕарах” ХЭУо ыанньыксыта Елена Ксенофонтова (Дьокуускай, Хатас), “Кириэстээх” кэпэрэтиип ыанньыксыта Елизавета Никифорова (Сунтаар), “Бөртө” сылгы собуотун ыанньыксыта Анна Слепцова, “Хахсык” кэпэрэтиип ыанньыксыта Агафья Шадрина (Хаҥалас) Тыа хаһаайыстыбатын министиэристибэтин Бочуотунай грамотатынан бэлиэтэннилэр. Үлэ дьонун уруйдаан, ускуустуба маастардара кэнсиэр көрдөрдүлэр.
Раиса СИБИРЯКОВА, «Саха сирэ» хаһыат, edersaas.ru