Ханнык баҕарар киһи талан ылбыт идэтинэн бигэ туруктаах, үрдүк хамнастаах тэрилтэҕэ үлэлиэн баҕарар. Хомойуох иһин, билиҥҥи үйэҕэ үгүс өттүгэр ол кыаллыбат. Сорох тэрилтэлэр хамнастарын кэмбиэргэ уган биэрэллэр, уоппуска, бырайыас харчытын төлөөбөттөр.
edersaas.ru
Онон, ыйыллыбыт болдьоҕор хамнаһы, уоппуска харчытын, араас социальнай төлөбүрдэри төлүүр тэрилтэни булар ыарахаттардаах. Бүддьүөт тэрилтэлэрэ эрэ Үлэ кодексын тутуһаллар. Чааһынай тэрилтэлэргэ балаһыанньа ыарахан соҕус. Үлэһиттэрин иккилии-үстүү ый үлэлэтэн, бэрчээккэ курдук уларыта сылдьар түгэннэрэ эмиэ баар.
Арассыыйаҕа, өрөспүүбүлүкэҕэ биллэр-көстөр бөдөҥ хампаанньаларга үлэлиир ордук табыгастааҕын экспертэр этэллэр. Үлэ кодексын тутуһалларын таһынан, өссө кэлэктиип дуогабарыгар олоҕуран, оҕолоохторго көмөлөһөллөр, олорор дьиэнэн хааччыйаллар.
Холобур, «Мегафон» хампаанньа Макрорегионун офиһын исписэлииһэ Артем Русаков кэпсииринэн, киниэхэ тэрилтэтэ социальнай эбэһээтэлистибэлэрин толорорун таһынан, өссө фитнес-кулуупка сылдьар сыллааҕы абонеменын төлөбүрүн аҥаарын уйунар эбит. «Хампаанньа үлэлииргэ табыгастаах усулуобуйаны тэрийэрин таһынан, өссө араас корпоративнай тэрээһиннэри ыытар. Барыта буор-босхо. Холобур, Уһук Илиҥҥэ уонна Илин Сибииргэ баар кэллиэгэлэрбин кытары спартакиадаҕа көхтөөхтүк кыттабыт. Кыайыылаахтар быйыл Санкт Петербурга баран кыттыбыттара», – диэн этэр.
Сорох хампаанньаларга Баҕа өттүнэн медицинскэй страховкалааһын полиһа (ДМС) баар. Үлэһиттэр ДМС-нан туһананнар, эпэрээсийэлэннэхтэринэ, санаторийга баран эмтэннэхтэринэ, ороскуоттарын хампаанньа полиһынан төлөттөрөллөр.
Бөдөҥ хампаанньалар, предприятиелар Үлэ кодексын тутуһан, өссө эбии дуогабар быһыытынан үлэһиттэригэр көмөлөһөллөрө хайҕаллаах суол. Онон, үлэтэ суох дьон ырыынакка бигэ туруктаах хампаанньаларга үлэлиирэ быдан ордук.
Биһ. корр., edersaas.ru