Хаарчаанабытын ылбыт Ленинград зоопарката бэртээхэй сонун хаартысканы таһаарбыт. Онно үрүҥ эһэбит оҕото арбуз сиэн күннүү олорор.
Зоопарка үлэһиттэрэ кэпсээбиттэринэн, Хаарчаана эбээтэ Услада отону наһаа таптаан сиир эбит. Ол иһин, кинилэр сиэн кыыс арбуһу төһө таптыаҕай диэн бу оҕуруот аһа үчүгэйдик ситэр, кытарар кэмин долгуйа күүппүттэрин туһунан СИА суруйар. Көрөргүт курдук, Хаарчаана арбуһу наһаа сөбүлээбит.
Санатан эттэххэ, Хаарчаана былырыын, биирдээҕэр эрэ, бу зоопаркаҕа ахсынньыга аҕалыллыбыта.
Билигин Петербурга кини эбээтэ Усладаны кытта баар. Услада былырыын төрөөбүтэ 30 сыллаах үбүлүөйүн бэлиэтээбиттэр. Онно зоопарка үлэһиттэрэ муус туордунан күндүлээбиттэр.
Суруйбуттарынан, Хаарчаанаҕа арбуһу таһынан өссө балык арааһын, сыалаах үчүгэй эти биэрэллэр. Сыалаах эт түлүөн сыатын курдук, онон үрүҥ эһэлэр олус сөбүлүүр аһылыктара диэбиттэр.
Куйааска Хаарчаанаҕа өссө ууга тоҥоруллубут оҕуруот астаах балыгы биэрэллэр эбит. Маны таһынан, Хаарчаана дьаабылыканы туох да наһаа таптыыр диэбиттэр. Кини араас хамаанданы толордоҕуна, зоопарка үлэһиттэрэ минньигэс дьаабылыканан күндүлүүллэрин үрүҥ эһэчээн көһүтэр буолбутун туһунан СИА суруйар.
Хаарчаананы көрөр-истэр исписэлиистэр хас сарсыарда аайы аһылыгын харыйаҕа, киниэхэ аналлаах араас оҥоһуктарга, дьиэтигэр кистииллэр эбит. Ону эһэчээн билэр буолан, тураат, тута көрдүүр, буллаҕына туох да наһаа үөрэр. Исписэлиистэр бэлиэтээбиттэринэн, маннык ньыма үрүҥ эһэ көхтөөх буоларыгар, хамсанарыгар-имсэнэригэр көмөлөөх уонна чинчийэн көрөргө, үөрэтэргэ аналлаах диэн «Петербург диниэбинньигэр» суруйбуттар.
Хаартыскалар: Ленинград зоопаркатыттан