Сайтпытыгар бу дьыл ыам ыйын 22 күнүгэр «Итирик дьахтар полицейскай сирэйин хайа тардыбыт«, ыам ыйын 29 күнүгэр «Полицияҕа күүһү туттуу — сокуоҥҥа силлээһин» диэн матырыйаалларым бэчээттэммиттэрэ. Онно полиция үлэһиттэригэр саба түһүү, ыыс-бурут тылларынан үөҕүү хас да дьыалатын суруйбутум. Хомойуох иһин, итинник түбэлтэлэр сотору-сотору тахсаллар.
Бу соторутааҕыта Ленскэй куоракка эмиэ итинник холуобунай дьыала көрүллэн, суут бириигэбэрэ тахсыбыта.
Суут быһаарбытынан, бу 2017 сыл саҥа үүнээтин, бырааһынньыктааҕы уһун сынньалаҥ кэмигэр, тохсунньу 3 күнүгэр, биир кыбартыыраҕа тохтоло суох улахан муусука тыаһыырыттан, айдаантан-куйдаантан сылайан, ыаллара полицияны ыҥырбыттар.
Полиция үлэһиттэрэ айдааннаах дьиэҕэ тугун-ханныгын быһаарса кэлбиттэригэр, итирик дьахталлар полицейскайдартан биирдэстэрин маатыралыы-маатыралыы, сирэйгэ охсубуттар. Ийэлэрэ оннук дьаабыланалларын, 5 уонна 6 саастаах оҕолоро көрөн турбуттар. Түүн 02.00 чааска бу кыра оҕолор итирик ийэлэрин кытта утуйбакка сылдьыбыттар.
Суут уурааҕынан, полиция үлэһитигэр сулууспатын эбээһинэһин толорор кэмигэр күүһү туттуу иһин 32 уонна 33 саастаах дьахталлар иккиэн буруйдааҕынан билиниллэн, ыстараап төлүүллэр.
Бу холуобунай эппиэтинэһи таһынан, дьахталлар оҕолорун иитэр эбээһинэстэрин сөптөөхтүк толорботторун иһин административнай эппиэккэ эмиэ тардыллыбыттар.
Маныаха силиэдэбэтэллэр санаталлар: сууттаныы буруйдаах киһиэхэ бэйэтигэр эрэ буолбакка, кини чугас дьонугар эмиэ охсуулаах — уопсастыба сэмэлиирин таһынан, кинилэр да, чугас аймахтара да сорох судаарыстыбаннай тэрилтэлэргэ үлэлиир кыахтара сарбыллар.
Полиция үлэһиттэригэр өрөлөһүү, үөҕүү, күүһү туттарынан суоһурҕаныы уонна күүһү туттуу иһин холуобунай эппиэтинэс баарын умнумаҥ!
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.