Бүгүн суоппардар идэлээх бырааһынньыктарын бэлиэтииллэр.
edersaas.ru
Ленскэй Орто Наахаратыттан төрүттээх Леонид Кусатов бу үөрүүлээх күнү бэрт улахан ситиһиилээх көрүстэ. Алтынньы 17 күнүгэр Дьокуускай куорат мэрията маршрутнай оптуобус бастыҥ суоппарын талыыга куоластааһын анал куонкуруһун биллэрбитэ. Бу тэрээһин сыл аайы ыытыллар. Куоластааһыҥҥа 11 предприниматель-суоппар кыттыбыта. Кинилэр ортолоругар 2011 сылтан 25-с №-дээх маршрутнай оптуобус суоппара Леонид Кусатов баара. 55 саастаах уопуттаах суоппар 1987-1992 сылларга төрөөбүт улууһун киинигэр Ленскэйгэ суоппарынан үллээбитэ. 1992-2011 сылларга Нерюнгри куоракка рейсовай оптуобуска суоппардаабыта. 2005 сыллаахха Леонид Александрович үлэтигэр бастыҥынан бэлиэтэнэн, СӨ Автомобильнай тырааныспарын Бочуоттаах үлэһитин аатын ылбыта. Уопуттаах суоппары «Азия оҕолоро» спортивнай оонньууларга барыларыгар омук оҕолорун тиэйэр оптуобуска үлэлэппиттэрэ. Маннык эппиэттээх үлэҕэ ылбычча киһини талбаттара чахчы.
Бээтинсэҕэ Дьокуускай куорат мэриятигэр суоппардары чиэстээһин тэрээһинигэр үөрүүлээх быһыыга-майгыга 25 №-дээх маршрутнай оптуобус суоппара Леонид Кусатовка «Дьокуускай куорат бастыҥ суоппара» бочуоттаах аакка тиксибитин туоһулуур анал бэлиэни туттардылар.
Куонкуруска 3813 киһи кыттыбытыттан, суоппар 1186 куолаһы хомуйан (31,10%), 1-кы миэстэҕэ таҕыста. Кини кэнниттэн иккистээбит биир идэлээҕэ — 18, 57% куолаһы ылла.
Онон күрэстэһээччилэрин ырааҕынан хаалларбыт Леонид Кусатов бүгүн аны чугас дьонуттан саҕалаан, Ленскэйтэн, Нерюнгриттэн уонна Дьокуускайтан бары аймахтарыттан, табаарыстарыттан, доҕотторуттан, биир идэлээхтэриттэн эҕэрдэ бастыҥын хомуйа олорор.
Киин куорат бастыҥ уопуттаах суоппарыгар Леонид Кусатовка эҕэрдэ бастыҥын этиигэ биһиги эмиэ кыттыһабыт!
Елена ПОТОЦКАЯ, «Саха сирэ» хаһыат, edersaas.ru