Үлэтэ суохтарга көмөлөһүөхтэрэ

Бөлөххө киир:

Ил Дархан Егор Борисов муус устар 21 күнүнээҕи ыйааҕынан, кыра дохуоттаах, кыаммат араҥаҕа кэккэ көмө миэрэлэрэ олоххо киирэн эрэллэр. Ыйаах чэрчитинэн, тыа хаһаайыстыбатын, үлэ уонна социальнай сайдыы, дьиэ кэргэн, ыччат министиэристибэлэрэ, дьарыктаах буолуу кэмитиэтэ бары кыттыһан, тустаах хайысхаларынан киэҥ, кэлим көмөнү оҥоруохтара.
Дьарыктаах буолуу судаарыстыбаннай кэмитиэтин салайааччы Степан Москвитин суруналыыстары мунньан, чопчу туох көмөнү оҥоруохтаахтарын кэпсээтэ.

Ангелина ВАСИЛЬЕВА, “Саха сирэ” хаһыат, edersaas.ru

Кэмитиэт, ыйаах чэрчитинэн, сүрүннээн үс хайысханан көмөнү оҥоруоҕа:
1. Бэйэ дьарыктаах буолуутун сайыннарыы. Үлэтэ суох дьон бэйэ дьыалатын арынан, дьарыктаах буолалларын ситиһэллэр. Кинилэргэ бастаан саҕалыылларыгар, атахтарыгар туралларыгар 150 тыһ. солкуобайга диэри көмө оҥоһуллар. Бу харчы биирдэ бэриллэр уонна төннөрүллүбэт. Ылбыт дьон отчуоттууллара хонтуруолланар. Парикмахерскайы, фотостудияны, иис ательетын, ыраас ууну атыылыыр тэрилтэни, о.д.а. арыныахтарын сөп. Атахтарыгар турдахтарына, бэйэлэрэ үлэ миэстэтин таһааран, дьону хамнастыахтарын сөп. Онтон cалгыы атын хайысханан грант, субсидия ылан, дьыалатын сайыннарыан сөп.
Мээнэ киһи ылбычча предприниматель буолар кыаҕа суох. Онон улуустар кииннэригэр баҕалаах дьону предпринимательство төрүттэригэр, нолуок, быраап боппуруостарыгар, бизнес-былаан оҥорорго 10 күннээх кууруска үөрэтиэхтээхтэр. Дьаһалта үлэһиттэригэр семинардар буолуохтара.
2. Тыа сиригэр быстах уопсастыбаннай үлэни хамнастааһын. Холобур, нэһилиэк дьаһалтата үлэтэ суох дьону наймылаһан, окко, күрүө тутуутугар, эргэ дьиэни көтүрүүгэ, сыбаалканы ыраастааһыҥҥа, уо.д.а. үлэлэтиэн сөп. Дьарыктаах буолуу сулууспаларын нөҥүө бу дьоҥҥо 21 тыһ. солк. хамнас төлөнөр. Өрөспүүбүлүкэ үрдүнэн бу хайысханан 2,5 тыһыынча киһи хабыллара былааннанар. Манна куораттар хапсыбаттар, холобур, Ньурба, Бүлүү куораттар.
3. Инбэлииттэри, элбэх оҕолоох төрөппүттэри, хаайыыттан босхоломмут, уо.д.а. дьону быстах үлэнэн хааччыйыы. Барыта 600 киһи хабыллыахтаах. Кинилэр социальнай өттүнэн көмүскэлэ суохтар, үлэ булаллара ыарахан.

Бу үс хайысханан барыта 3,5 тыһыынча киһи хабыллара былааннанар. Чахчы көмөҕө наадыйар дьоҥҥо аадырыстаммыт үлэни үрдэтэргэ туһуламмыт ыйаах диэн сыаналыыбын. Нэһилиэктэргэ анал хамыыһыйалар тэриллэллэр. Манна дьаһалта үлэһиттэрэ, олохтоох дьокутааттар, түөлбэ салайааччылара, уопсастыбанньыктар киирэллэр. Кинилэр ким туохха наадыйарын билэн олорор буоллахтара дии. Хамыыһыйа мунньаҕа боротокуолга киллэриллэр. Кинилэр улуустааҕы дьарыктаах буолуу киинин кытта дуогабар түһэрсэллэр.
Ыйаах от ыйын 1 күнүттэн үлэлээн барыаҕа. Онуоха диэри бэлэмнэнии үлэтэ ыытылла турар. Холобур, дьаһалта үлэһиттэригэр семинардар буолуохтара, — диэн Степан Иванович кэпсээтэ.
Суруналыыстар биэнсийэлээх киһи үлэтэ суохтар ахсааннарыгар киирэр дуо диэн ыйыттылар.
Суох, киирбэт. Кини судаарыстыбаттан харчы ылар, онон социальнай өттүнэн көмүскэллээх. Билиҥҥи туругунан, “Сахастат” дааннайынан, өрөспүүбүлүкэҕэ 37 тыһыынча үлэтэ суох киһи баар. Ордук тыа сиригэр үлэтэ суох киһи элбэх. Тоҕо диэтэххэ, онно ырыынак кыра, бизнес сайдарыгар күчүмэҕэйдэрдээх. Ону тэҥэ, ыччат түбэһиэх үөрэххэ киирэн баран, идэтинэн үлэлээбэт, уопута суох буолан үлэ булбат. Онон биһиги итинник миэрэлэринэн дьоммутун өйүөх тустаахпыт, — диэн кэмитиэт салайааччыта хоруйдаата.

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0