Лиидэр-оскуолалар оҕо дьоҕурун сайыннарыыга төһүү буолуохтара

Бөлөххө киир:

 Үөрэх уонна наука миниистирэ Владимир Егоров Норуоттар икки ардыларынааҕы I интеллектуальнай оонньуулар түмүктэринэн брифинг ыытта.


Владимир Анатольевич бастаан Интеллектуальнай оонньуулар түмүктэрин билиһиннэрдэ, онтон суруналыыстар ыйытыыларыгар хоруйдаата.

От ыйын 8-15 күннэригэр Саха Өрөспүүбүлүкэтигэр ыытыллыбыт Интеллектуальнай оонньуулары Арассыыйа Үөрэҕин уонна наукатын министиэристибэтэ, Арассыыйа Наукаларын академията өйөөтүлэр. Итиэннэ, маннык хабааннаах, научнай үөрэхтээһиҥҥэ сирдиир бөдөҥ тэрээһин ЮНЕСКО патронатынан барда. Биллэрин курдук, бу I Интеллектуальнай оонньуулары ыытыы идиэйэтин 2016 сыллаахха СӨ бастакы Ил Дархана Егор Борисов көҕүлээбитэ.

Норуоттар икки ардыларынааҕы интеллектуальнай оонньуулар (МИИ) кэмнэригэр 20-тэн тахса куонкурус уонна куонкуруһу таһынан тэрээһиннэр, наукаҕа уонна технологияҕа үөрэнээччилэр  научнай-чинчийэр үлэлэригэр норуоттар икки ардыларынааҕы быыстапка, симпозиум  ыытылыннылар. Араас дойдулартан 900-тэн тахса үөрэнээччи робототехникаҕа, математикаҕа, физикаҕа, химияҕа уонна информатикаҕа күрэхтэстилэр. Куонкурустары таһынан хайысхаҕа араас дойдулар учуонайдара маастар-кылаастары ыыттылар. Маны таһынан, научнай үөрэхтээһиҥҥэ симпозиумҥа  Саха Өрөспүүбүлүкэтиттэн балтараа тыһыынчаттан тахса педагог кыттан, үөрэхтээһин ситимин сайыннарыы тоҕоостоох проблемаларын дьүүллэстилэр. Лектордар күүстээх экспертнэй састааптара үлэлээтэ.

—Улахан, арааһа, далааһынынан, “Азия оҕолоро” спортивнай оонньууларга тэҥнээх, киэҥ тэрээһин буолан ааста. Кэтэспиппитинээҕэр быдан элбэх кыттааччы кэлэ сырытта. 18 араас дойдуттан 181 оскуола, ол иһигэр Арассыыйа 11 эрэгийиэниттэн бэрэстэбиитэллэр кытыннылар. Оттон  салайааччылары, тютордары, дьүүллүүр сүбэ чилиэннэрин, экспертэри, волонтердары барыларын аахтахха —  Сир шарын 39 араас дойдутун бэрэстэбиитэллэрэ биһиги Сахабыт сиригэр кэлэн бардылар. Ыалдьыттарбыт Оонньуулар ис хоһооннорун сөбүлээтилэр, тэрээһининэн астыммыттарын биллэрдилэр. Култуурабытын, өрөспүүбүлүкэбит айылҕата олус кэрэтин сөхтүлэр. Уонна, биир саамай сүрүнэ — биһиги оҕолорбут норуоттар икки ардыларынааҕы хамаандаҕа үлэлиир уопуту ыллылар, араас дойдуттан араас омук  оҕолорунаан алтыстылар, сибээс олохтоотулар, доҕордостулар. Онон, кинилэр салгыы бииргэ үлэлэһиилэрин өйүүргэ дьулуһуохпут, — диэтэ миниистир.

Айдарыылаах оҕолору кытта мантан салгыы хайдах үлэлиир туһунан педагогтар симпозиумҥа эмиэ сүбэлэспиттэрэ. Билигин сүрүн эрэл үөрэхтээһин тиһигин  үөскэтиигэ — Ил Дархан ситимин олохтооһуҥҥа ууруллар. Хас биирдии оскуола дьоҕурдаах үөрэнээччилэригэр сайдар кыах үөскэтиллиэхтээх. Оҕолор хамаанданан үлэлииргэ үөрэниэхтэрэ. Хас улуус аайы баар тирэх оскуолалар  өрөспүүбүлүкэ лиидэр-оскуолаларын кытта бииргэ үлэлэһиэхтэрэ, оттон лиидэр-үөрэх кыһалара аан дойду үөрэхтээһиҥҥэ бастыҥ тэрилтэлэригэр тахсыахтара. Маннык систиэмэлээх үлэ хас биирдии айдарыылаах үөрэнээччи талаана, дьоҕура арылларыгар көмөлөһүөҕэ.

Татьяна МАРКОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0