Балаҕан ыйын 20-24 күннэригэр Хабаровскай куоракка Уһук Илин норуоттарын үгэстийбит култуураларын харыстыыр, өйүүр, сайыннарар, доҕордоһууну бөҕөргөтөр сыаллаах-соруктаах “Лики наследия-2018” бэстибээл буолла.
Далааһыннаах тэрээһин “Вместе мы – Россия” Бүтүн Арассыыйатааҕы бэстибээлгэ сүүмэрдиир этап быһыытынан ыытыллыбыт. Манна Приморьеттан, Сахалинтан, Хабаровскайтан, Бурятияттан, Соҕуруу Кэриэйэттэн уонна биһиги өрөспүүбүлүкэбититтэн СӨ култуура уонна ускуустуба кэллиэһэ кыттыбыттар. Дэлэгээссийэҕэ кэллиэс дириэктэрэ Захар Никитин, кэлэктиип салайааччыта — Мария Боппоенова, преподавателлэр Михаил Винокуров, Сардаана Харитонова, “Эйгэ” устудьуоннар тыйаатырдара (4-с куурус устудьуона Уйгу Семенов, 3-с кууруска үөрэнэр ыччаттар Иван Алексеев, Виктория Домнина, Сардаана Максимова, Екатерина Слепцова, 2-с куурустан Даниил Атласов, Волдемар Львов киирбиттэр.
Тэрээһин чэрчитинэн, түһүлгэҕэ түмсүбүт ыалдьыттар актер маастарыстыбатыгар сылдьыбыттар, национальнай үҥкүүлэргэ үөрэммиттэр, норуот ырыаларын истибиттэр, уус-уран оҥоһуктары көрбүттэр-истибиттэр. Салгыы Уһук Илин уокуругун национальнай-культурнай түмсүүлэрин кытары “төгүрүк остуолга” норуоттар үгэс буолбут култуураларын харыстааһын, сайыннарыы, доҕордоһууну бөҕөргөтүү туһунан кэпсэппиттэр.
Кэллиэс ыччаттара бэстибээлгэ үрдүк таһаарыылаахтык кыттыбыттара бэлиэтэммит. Норуот үнүстүрүмүөннэрин ансаамбыла “Ритмы земли Олонхо” (а capella, хомус), “Эйгэ” тыйаатыр “Албаныкы-салбаныкы” чабырҕахха этюда, “Ууска уһуйуу” сиэрин-туомун көрдөрүүтэ, “Туйаарар” ырыа ансаамбыла норуот ырыаларыттан попуррины дэгэрэҥ, дьиэрэтии истиилинэн толоруулара, национальнай инструменнар ансаамбылларын солиһа Уйгу Семенов хомуска “Дыхание весны” дьүрүһүтүүтэ дохсун ытыс тыаһынан арыалламмыттар, хайҕалы ылбыттар.
Түмүккэ, “Ансамбли и хоры народной песни” номинацияҕа — “Туйаарар” ансаамбыл, “Ансамбль народной музыки” номинацияҕа — “Эйгэ” тыйаатыр национальнай үнүстүрүмүөннэргэ ансаамбыла I истиэпэннээх лауреаттарынан, “Фольклорные ансамбли” — “Эйгэ” II, “Солисты” номинацияҕа Уйгу Семенов I истиэпэннээх лауреаттарынан буолбуттар.
«Лики наследия» бэстибээл тэрийэр кэмитиэтэ 2019 сылга Москубаҕа ыытыллар “Вместе мы – Россия” Бүтүн Арассыыйатааҕы VI-с бэстибээл гала-кэнсиэригэр бу тэрээһиҥҥэ кыттан I истиэпэннээх лауреаттарынан буолбут кэлэктииптэртэн, солистартан кимнээх кытталларын быһаарыа.
Биһиги корр., “Саха сирэ” хаһыат, edersaas.ru