close
Лингвист Семен Новгородов аатынан уулусса баар буолла...
· - Култуура - Кыһа - Олох-дьаһах

Лингвист Семен Новгородов аатынан уулусса баар буолла

Бэҕэһээ Дьокуускай куорат Дуумата куорат биир уулуссатыгар лингвист-учуонай, научнай-педагогическай уонна уопсастыбаннай-бэлитиичэскэй диэйэтэл Семен Андреевич Новгородов аатын иҥэрэргэ быһаарда.

edersaas.ru


Линвист Семен Новгородов аатынан уулусса Арчы дьиэтин кэтэҕэр, Чернышевскай уулуссаны сэргэстэһэ олохтонуоҕа.

Лингвист Семен Новгородов аатынан уулусса

Биллиилээх лингвист аатын иҥэрэр туһунан боппуруоһунан 2016 сылтан Семен Новгородов сиэн-балта Надежда Кузьмина туруулаһан туран дьарыктаныытын түмүгэр ситиһилиннэ диэн бэлиэтиир оруннаах. “Семен Новгородов аатынан уулусса өссө 1925 сыллаахха ЯЦИК бэрэссэдээтэлэ Былатыан Ойуунускай  илии баттааһыннаах баар буолбута. Ити аныгынан Дьокуускай куорат 2-с №-дээх оскуолатын таһыгар Курашов, Ярославскай уулуссалар аттыларыгар баара. Ол эрээри, кэлин куоракка тутуу уларыйан-тэлэрийэн, ити уулусса бүтэһик дьиэтэ аҕыйах сыллааҕыта көтүрүллүбүтэ. Убайым, норуот суруйааччыта Семен Попов-Сэмэн Тумат өйөбүлүнэн 2016 сылтан Семен Новгородов аатынан уулуссаны чөлүгэр түһэрэри туруорсубутум эрээри, кыаллыбат диэн аккаастаабыттара. Атын барыйааннар бааллара да, табыллыбатаҕа. Ол оннугар Арчы дьиэтин кэтэҕэр (Эргэ куоракка) 310 миэтэрэ усталаах уулусса “Лингвист Семен Новгородов” аатын сүгэр кыахтанна. Бу сатыы дьоҥҥо аналлаах уулусса буолуоҕа. Миигин өйөөбүт дьоҥҥо барыларыгар махтанабын”, — диэн лингвист сиэн-балта кылгастык кэпсээтэ.

Былатыан Ойуунускай илии баттааһыннаах докумуон

Инньэ гынан, историческай суолталаах кырдьык оннун булла. Ыччат хараҕын далыгар сырыттаҕына, учуонай Новгородов аата өлөн-сүтэн биэриэ суоҕа.

 

Людмила ПОПОВА, «Саха сирэ» хаһыат, edersaas.ru

Хаартыскалар Надежда КУЗЬМИНА тус архыыбыттан туһанылыннылар.

#бүгүн: 1
3
0

Сайт матырыйаалларын ааптар көҥүлэ суох ылар бобуллар.