“Саха сирин суруйааччылара” ассоциация А.М. Горькай аатынан Литературнай институт научнай-үөрэтэр уонна культурнай-сырдатар киини кытары тылбаасчыттарга куонкурус биллэрэллэр. Куонкурус кыайыылаахтара Литературнай институкка киирэргэ мэктиэлэниэхтэрэ.
Куонкурус литератураҕа сыһыаннаах, талааннаах ыччаты булар, кинилэр Москва, Арассыыйа суруйааччыларын кытары айар сибээстэрин бөҕөргөтөр, идэтийбит тылбаасчыттары бэлэмниир сыаллаах ыытыллар.
Кыттыан баҕалаахтар 2018 сыл ахсынньы 1 күнүгэр диэри сайаапкаларын түһэриэхтээхтэр: ааттарын толору, төрөөбүт күннэрин, ханна олороллорун, төлөпүөннэрин, электроннай почталарын, сахалыы-нууччалыы тыллары билэр таһымнарын, урукку тылбаастарын (баар буоллаҕына) ыйан туран.
Тылбааска анаан 3 айымньы бэриллэр (биири талан ыларга):
- Нина Протопопова. “Маҥан туллук эрэ далластыыр».
- Куорсуннаах. „Талааны талбаттар“.
- Сэмэн Тумат. “Тунал хаар үөрүүтэ”.
(Бу айымньылар бэлэмнэммит тиэкистэрэ sakhalitera.ru сайтка бааллар).
Куонкурус кыайыылаахтара 2019 сылга А.М. Горькай аатынан Литературнай институт саха тылыттан уус-уран тылбаас семинарыгар (5 сыллаах) киирэргэ мэктиэлэниэхтэрэ. Манна БКЭ баалын эмиэ көрөллөр.
Үлэлэри электроннай почтанан ыытаҕыт.
1) Сайаапка (сайаапката суох үлэлэри туппаттар, сайаапка баара куонкурус усулуобуйатын кытары сөбүлэһиини биллэрэр); манна араспаанньаны, ааты, аҕа аатын, төрөөбүт сылы, олорор сир аадырыһын, кылгас автобиографияны уонна бэчээттэммит айымньылар испииһэктэрин (баар буоллаҕына) суруйаҕыт;
2) Куонкуруска кыттар үлэ (файл аатыгар араспаанньа уонна айымньы аата суруллар. Холобур: Данилов_Талааны талбаттар).
Суругу ыытан баран, эппиэт сурук кэлэрин күүтэҕит.
Үлэлэри Microsoft Office Word редакторга, doc форматка, Times New Roman гарнитураҕа, 14 шрибинэн, «ёлочка» кавычканы туһанан оҥороҕут. Илиистэрин нүөмэрдиигит. Титульнай лиискэ араспаанньа, аат, аҕа аата, үлэ аата суруллар.