«Якутскэнерго» тэрилтэ «Мохсоҕоллоох»подстанцияны саҥалыы уларытан тута сылдьар. Бу эбийиэк Мохсоҕоллоох, Бэстээх, Булгунньахтаах бөһүөлэктэри, Покровскай куораты уонна «Сокол», «Якутцемент» тэрилтэлэри уотунан хааччыйар.
edersaas.ru
«Подстанцияны саҥалыы уларытан тутуу биһиэхэ улахан суолталаах, – диир «Якутцемент» генеральнай дириэктэрэ Алиш Забид-оглы Мамедов. — Быйыл саҥа собуоту үлэҕэ киллэрдибит, ол иһин 50 мегавольт-ампертан 68 диэри уоту туһаныыбыт улаатта».
«Якутскэнерго» салайааччыта Александр Слоик бэлиэтээн этэринэн, Хаҥалас улууһун биир тутаах подстанциятын өрөмүөнэ 10 тыһыынча киһи олорор дьиэлэрин уонна промышленнай эбийиэктэрин уотунан хааччыйыытын күүһүрдүөҕэ. 2015 сыллаахха саҕаламмыт бырайыак 4 түһүмэҕинэн оҥоһуллар. Бастакы түһүмэххэ энергетиктар 25 МВА кыамталаах трансформатор туруорбуттар уонна 110 кВ кыамталаах аһаҕас распределительнай тэриллэр шиналарыгар холбообуттар, итиэннэ 6 кВ кыамталаах сабыылаах распределительнай тэриллэргэ. Иккис түһүмэххэ «Табаҕа — Мохсоҕоллоох» үрдүк күүрүүлээх линияҕа аналлаах оборудованиены туруорбуттар, сиргэ ситимнээһини, шиннай муостаны, релейнай көмүскэли, сибээс, телемеханика тэрилин оҥорбуттар. Күн бүгүн «Якутскэнерго» үлэһиттэрэ үһүс уонна төрдүс түһүмэхтэргэ аһаҕас распределительнай тэриллэри саҥалыы туруораллар, 10 МВА кыамталаах трансформаторы көтүрэллэр уонна 25 МВА кыамталааҕы туруораллар, «Табаҕа-Мохсоҕоллоох» линиятын саҥа оборудованиетын оҥороллор.
«Якутскэнерго» ПАУо Киин электрическэй ситимин пресс-сулууспата