Ньурба улууһун Маар бөһүөлэгин эбээлэрэ “Алгыс” диэн түмсүүлээхтэр. Манна кинилэр үҥкүүлүүллэр, ыллыыллар-туойаллар, иистэнэллэр, физкультуранан-спордунан дьарыктаналлар, чөл олоҕу киэҥник тарҕаталлар.
Эбээлэр түмсүүлэрэ 2009 сыллаахха, социальнай үлэһит Валентина Егорова көҕүлээһининэн, тэриллибитэ. “Алгыс”-тар, чахчы, олус көхтөөхтөр. Ол курдук, хорсун эбээлэр чөл олоҕу тарҕатан, уопсайа 70-ча километрдаах сиринэн 5 нэһилиэги хабан, бэлисэпиэтинэн айаннаабыттарын дьон сөҕө-махтайа ахтар.
Оттон ыаллыы Үөһээ Бүлүү улууһугар 2017 – Чөл олох сылын чэрчитинэн ыытыллыбыт “Сааһы билиммэт кэрэ абылаҥ” үҥкүү куонкуруһугар араас улуустартан 9 түмсүү кыттыбытыттан “Алгыс” түмсүү эрэллээхтик кыайан, Гран-при ылла! Кыайыылаах эбээлэр көһө сылдьар кубогынан уонна уокка холбоон иистэнэр массыынанан наҕараадаланан, үөрүүлэрэ үрдүк.
Ситиһии итинэн эрэ бүппэт, холобур, бэйэлэригэр Маарга ыытыллыбыт 4 улуус кыттыылаах “Алыптаах үҥкүү түһүлгэтэ” куонкуруска “Алгыс” эмиэ бэрткэ табыллан үҥкүүлээн, лауреат буолбута.
Түмсүү салайааччыта, сцена бэтэрээнэ Валентина Егорова уопсастыбаннай үлэнэн дьарыктаммыта быйыл лоп курдук 45 сылын туолла. Онон, Саха Өрөспүүбүлүкэтин уопсастыбаннай түмсүүлэрин үлэлэрин сайдыытын өйүүр “Эйгэ” уопсастыбаннай тэрилтэ бу соторутааҕыта, Саҥа Дьыл бырааһынньыгар Валентина Васильевнаҕа “Норуот билиниитэ” үрдүк бэлиэни туттарда.
Дьоҥҥо үтүө холобур буолар, үөрүүнү бэлэхтиир түмсүүлээх, көхтөөх эбээлэргэ саҥа үөрүүлэр, саҥа ситиһиилэр кэлэ турдуннар.
Татьяна МАРКОВА, «Саха сирэ» хаһыат, edersaas.ru