Култуура министиэристибэтэ уонна Инновационнай менеджмент үрдүкү оскуолата, Эдэр экэнэмиистэр ассоциациялара илиинэн оҥорор маастардарга уонна аудио-визуальнай технология исписэлиистэригэр анаан “Творческий кластер: Экономика креатива” диэн форум тэрийдилэр. Форуму ыытарга «Алмаасэргиэнбаан” көмөлөстө: баан социальнай ноҕурууска ылынан, айар дьоҥҥо анал бырайыак оҥорор.
Ангелина ВАСИЛЬЕВА, “Саха сирэ” хаһыат, edersaas.ru
Үөрэтии буор-босхо. “Бассаабынан” эрдэттэн биллэрии барбыт буолан, саала иһэ толору. Манна кылынан, маһынан, оҕуруонан, кырадаһынынан, муоһунан, тимиринэн, көмүһүнэн, о.д.а. уһанар, иистэнэр маастардар, ону тэҥэ сахалыы таҥаһы, киэргэли, иһити оҥорон атыылыыр предпринимателлэр, дизайнердар, устудьуоннар мустубуттар.
Култуура миниистирин солбуйааччы Владислав Левочкин Ил Дархан аччыгый бизнеһи сайыннаран, үлэ миэстэтин таһааран, норуот уус-уран оҥоһуктарын оҥорор маастардары өйүүр туһунан эппитин санатта. Кини тустаах бырайыактары оҥорон киллэрбит маастардары министиэристибэ өйүүрүн, көҕүлээһиннэри күүтэрин туһунан иһитиннэрдэ.
Санкт-Петербуртан Calvert forum бырайыак салайааччыта, Айар индустрияны өйүүр пуонда дириэктэрэ Денис Щукин уонна “Креативные практики” үөрэтэр-ырытар бырагыраама куратора Мария Буряк лиэксийэ аахтылар.
Бу Calvert 22 фонд Англияҕа тэриллибит, кэнники сылларга Арассыыйаҕа тэнийэн үлэлээн эрэр. Билигин “Мастера Сибири” диэн бырайыак оҥоро сылдьаллар.
Кинилэр норуот үгэскэ кубулуйбут оҥоһуктарын аныгылыы, сонун көрүҥнээн баран, атыылыыр ньымалары үөрэттилэр. Интэриниэт, социальнай ситимнэр күүстэрин хото туһанарга сүбэлээтилэр. Денис Щукин Саха сиригэр олус ураты суоллаах-иистээх маастардар баалларын кылгас кэм иһигэр көрөн-истэн итэҕэйбиттэрин эттэ. Ол гынан баран, кинилэр оҥорбут табаардарын хайдах суулаан-хаалаан, атыннык эттэххэ табаарынай көрүҥнээн, Арассыыйаҕа, тас дойдуларга атыылыыр ньымалары билбэттэр.
Манна кыра мөккүөр тахса сырытта. Художественнай училище дириэктэрэ Кирилл Гаврильев:
“Норуот уус-уран оҥоһуга – кини духуобунай, култуурунай баайа, ону аныгылыы көрүҥнүүбүт дии-дии уларытар-тэлэритэр сыыһа. Холобур, чороон былыргылыы ньыманан мастан эрэ оҥоһуллуохтаах. Өссө аан дойдуга ыһан кэбистэххэ, ол култуурунай баайбытытыттан олох да матыахпытын, норуот быһыытынан симэлийиэхпитин сөп”, — диэн бэйэтин санаатын эттэ.
Кини эппитигэр даҕаһан, СӨ норуоттарын материальнайа суох култуурунай нэһилиэстибэлэрин киинин салайааччы, учуонай Агафья Захарова:
“Кытайдар биһиги оҥоһуктарбытын үтүктэллэрин тохтотор сокуон суох. Сэлии муоһун туох да хааччаҕа суох Кытайга таһааралларын бобор сокуон эмиэ суох. Онон көмүскэлэ суох олоробут. Холобур, олоҥхобутун бу курдук “креативнайдаан”, аныгылыы моһуоннаан уларытан биэрбиппит буоллар, ЮНЕСКО кылаан чыпчаал айымньыта буолуо этэ дуо?” – диэн утарарын биллэрдэ.
Ол эрээри, эдэрдэр бу этиини өйөөбөтүлэр. Төрүт үгэстэри, оҥоһуктары чөл хаалларыы, сайыннарыы үлэтэ бара туруохтаах, оттон маастардар бэйэлэрин оҥоһуктарын батаралларыгар аныгылыы суолу-ииһи көрдүөхтээхтэр диэн эттилэр. “Күөгү биэрдэххэ, бэйэбит да балыктыахпыт” диэн саҥалар иһилиннилэр. Сорохтор “Мастера Сибири” бырайыакка хайдах киирэр туһунан ыйыталастылар, төлөпүөннэрин нүөмэрин атастастылар.
Оттон “Чороон XXI век” хампаанньа дириэктэрэ Софья Попова:
“Култуура министиэристибэтэ уонна “Алмаасэргиэнбаан” бу боппуруоска, дьэ, кэмниэ-кэнэҕэс болҕомтолорун уурбуттарыттан үөрдүм. Биһиги 15 сыл устата бэйэбит күүспүтүнэн саха иһитин фарфорга кубулутан, инновационнай ньыманан үлэлээн кэллибит. Инникитин кластер арыйан, баҕалаах дьону босхо үөрэтиэхпит”, — диэн эппитин маастардар үөрэ иһиттилэр.
Ангелина ВАСИЛЬЕВА, “Саха сирэ” хаһыат, edersaas.ru
Ааптар хаартыскаҕа түһэриилэрэ.