Майаҕатта оҕуһу сүүскэ биэрбэт буоллулар

Бөлөххө киир:

Уус Алдан Тулунатыгар иккис кыһынын ойуурга кыстыыр «былааннаах» борооску туһунан суруйуубут социальнай ситимнэргэ уонна олохтоохтор ортолоругар үгүс кэпсэтиини таһаарда. Өссө маны ааһан, сорох дьон оҕуһу өрүһүйээри, от атыылаһарга харчы ыыта сатаабыттар…

edersaas.ru

Таһырдьа кыстыан баҕалаах оҕуһу аһыммыттыы, халлааммыт дьыл баччатыгар диэри сымнаһыар турда. «Ол эрээри,  хаһан эрэ тымныыбыт ытарчалыы ылыа турдаҕа» диэн Уус Алдан улууһун Тулуна олохтоохторо этэллэр. Бу кыһын тоҥон-хатан кыһыны туораабытын умнубут сүөһү буоллаҕа дуу? Эбэтэр ааспыт кыстыкка хотоҥҥо киирэрин уһата сатыы сырыттаҕына, күөйэн мөрөйдөөбүт, онтон саанан ытыалаабыт эрэттэртэн сүрэҕэ хайдан, ити кыараҕас уораҕайга киирэн биэрдэҕинэ идэһэ буоларын сүрэҕэ да таайара буолаахтыа дииллэр.

Сорох дьон дьикти оҕуһу «Орто дойду» зоопарката ылара дуу диэн эмиэ кэпсэттилэр. Инньэ гынан, зоопарка үлэһитэ Людмила Коженкинаны кытары сибээскэ тахса сырыттыбыт. Онуоха, Людмила Ивановна: «Саха боруодата эбитэ буоллар, баҕар, ылыа этибит. Ол эрээри итинтибит симментал эбит. Эбиитин көҥүл-босхо сылдьыбыт борооску биһиги зоопаркабытыгар сатаан сылдьыбата чуолкай», – диэн этэр.

Хаһаайка Аграфена Ксенофонтовна: “Бэйэбит оттуур сирбит халдьаайы сир буолан өҥ да дьылга кэмчи оттоох сир, быйылгы курааҥҥа олох да мэлийдибит. Онон дьон алаастарын аҥаарга диэн оттоотубут да олох кыра. Бара сатаан, бэйэтин оннугар ууламмыта биллибэт ийэтин туттарбыт дуу диэн баран, торбоспут суохтаан моруу буолуо диэн аһынарбыт бэрдиттэн буккулла сылдьабыт. Ойууруттан кэтээн-манаан ийэтэ уулуу тахсарын көрөөт, барахсаммыт үөрбүттүү-көппүттүү ойуоххалаан түһээхтиир.

Быйыл күүһүлээн киллэрэ сатаабатыбыт. Бэйэбит араастаан муҥнана сатаатыбыт да киирбэт. Бэйэтэ киирэрэ дуу диэн, хотон аанын аһаҕас хааллара сылдьыбыппыт. Туора киһи кэллэ да, ойуурга өссө дириҥник түһэр буолбут. Дьиктитэ диэн, аһаҕас сиргэ массыынанан чугаһаатахтарына, кыһаммат. Оттон массыынаттан ким эмэ таҕыстаҕына, ойууругар куотар. Бу хаартыскаҕа түһэрбит чугас ыалбыт уола Степа Игнатьев сатыы кэлэн чугастан кыайан түһэрбэтэҕэ. Онон массыынанан кэлэн иһигэр олорон, 4-5 миэтэрэ чугастан түһэртээбит. Миигиттэн илиибиттэн оту ылар бэйэтэ, утары көрдөхпүнэ сэрэхэдийэр, кэннинэн сыҕарыйар буолбут. Онон кини диэки көрбөккө. өлүү отун уурабын», – диэн кэпсиир.

Бу борооску дьылҕатыгар тоҕо ороостугут диэххит. Ол эрээри кыһыҥҥы тостор тымныыга дьиэ сүөһүтэ ойуурга кыстыыра диэн ураты уонна дьикти. Инньэ гынан, олохтоох дьаһалта онуоха-маныаха диэри отунан көмөлөһүөх, итиэннэ өрүс суола турдаҕына тыа хаһаайыстыбатын исписэлиистэрэ дьикти оҕуһу тахсан көрүөх-истиэх, үөрэтиэх буолбуттар.

Хаартыска: Тулуна оскуолатын үөрэнээччитэ Степа Игнатьев түһэриилэрэ.

edersaas.ru

+1
0
+1
0
+1
0
+1
0
+1
0
+1
0
+1
0