Майа оскуолатын үөрэнээччилэрэ дойду таһымнаах «Саҕалааччы фермер» оонньууга кыайдылар
Тыа сирин ыччатын Россиятааҕы сойууһа ааспыт нэдиэлэҕэ Москваҕа “Саҕалааччы фермер” диэн өй оонньуутун бэһис төгүлүн тэрийэн ыытта. Онно Саха сирин аатыттан өрөспүүбүлүкэтээҕи көрүү кыайыылааҕа – В.П.Ларионов аатынан Майа орто оскуолатын хамаандата ситиһиилээхтик кытынна.
Василий НИКИФОРОВ,«Саха сирэ» хаһыат, edersaas.ru
Саха оҕолоро Крым, Ставрополье, Омскай уонна Самара уобаластарын хамаандаларын кытта бастыҥнар истэригэр эрэллээхтик киирдилэр. Майа оскуолатын үөрэнээччилэрэ былакаат куонкуруһугар, интернет ситиминэн саамай элбэх куолаһы ыланнар, бастаатылар. РФ тыатын хаһаайыстыбатын миниистирин солбуйааччы Иван Лебедев быйылгы оонньуу кыайыылаахтарын – Кемеровотааҕы судаарыстыбаннай тыа хаһаайыстыбатын академиятын, Красноярскайдааҕы уонна Ставропольетааҕы судаарыстыбаннай аграрнай университеттар, Самаратааҕы судаарыстыбаннай тыа хаһаайыстыбатын академиятын, В.И.Вернадскай аатынан Крымнааҕы федеральнай университет, Омскайдааҕы аграрнай техникум уонна В.П.Ларионов аатынан Майатааҕы бүттүүн орто үөрэхтээһин оскуолатын хамаандаларын наҕараадалыырыгар: “Министиэристибэ АПК тиһигэр кадры үүннэриигэ уонна наука кыаҕын туһаныыга ураты болҕомтотун уурар. Тыа хаһаайыстыбатын кэлэр уонунан сылларга сайыннарыы бу эһиги курдук эдэр дьонтон тутулуктаах”, — диэтэ.
“Саҕалааччы фермер” оонньуу үөрэнээччилэр, устудьуоннар тыа хаһаайыстыбатыгар бизнеһи былаанныыр, информацияны хомуйар уонна ырытар, быһаарыы ылынар уонна хамаандаҕа үлэлиир үөрүйэхтэрин сайыннарар соруктаах. Саха сирин үөрэнээччилэрэ “Майа-мүөт” бааһынай хаһаайыстыба оҥорон таһаарар тигээйи мүөтүн батарыыга анаабыт бизнес-бырайыактара дипломунан биһирэннэ. Тыа сирин ыччатын Россиятааҕы сойууһун киин сэбиэтин бэрэссэдээтэлэ Юлия Оглоблина оонньуу финалистара бизнес-бырайыактарын үрдүк таһымнаахтык бэлэмнээбиттэрин бэлиэтээтэ.
Быйылгы оонньууга регионнааҕы түһүмэх кыайыылаахтарыттан барыта 73 үлэ киирбититтэн экспертнэй жюри 43 бырайыагы талан ылан көрбүт. Бастыҥ бырайыактары дойду тыатын хаһаайыстыбатын министиэристибэтэ “Саҕалааччы фермердэри өйөөһүн” бырагыраамаҕа кыттарга мэктиэлиир. Тэрийээччилэр ааҕалларынан, интеллектуальнай оонньуу биэс төгүл ыытыллыбытыгар 100-тэн тахса аграрнай үөрэх тэрилтэтиттэн алта тыһыынча кэриҥэ устудьуон кыттыбыт.
Василий НИКИФОРОВ,«Саха сирэ» хаһыат, edersaas.ru
Хаартыскаҕа: Россия таһымыгар “Саҕалааччы фермер” интеллектуальнай оонньууга ситиһиилээхтик кыттыбыт Майа оскуолатын үөрэнээччилэрин бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев эҕэрдэлээтэ.