Муус устар 15 күнүгэр Майа сэлиэнньэтэ төрүттэммитэ 115 сылыгар анаммыт үөрүүлээх тэрээһин киэҥ далааһыннаахтык ыытылынна.
Тэрээһин үөрүүлээх чааһыгар «Майа сэлиэнньэтэ» МТ баһылыга Тимофей Нестеров олохтоохтору уонна ыалдьыттары эҕэрдэлээтэ, Майабыт сайдарын, чэчириирин туһугар бииргэ үлэлиэҕиҥ диэн ыҥырда. Сэлиэнньэ 115 сааһыгар ананан тэрилтэлэр икки ардыларыгар ыытыллыбыт муус оҥоһуктар куонкурустарыгар кыайыылааҕынан тахсыбыт Майатааҕы лицей дириэктэригэр грамотаны, бальнай үҥкүүгэ өрөспүүбүлүкэтээҕи күрэс кыайыылаах хамаандатын бэрэстэбиитэллэригэр Ян Новгородовка, Александр Степановка Махтал суруктары туттарда.
Улуус баһылыга Николай Старостин Майа сылтан сыл кэҥээн, саҥа дьиэлэринэн киэркэйэн иһэрин бэлиэтээн туран, төрөөбүт дойдубутун өссө күүскэ ытыктыаҕыҥ, харыстыаҕыҥ, сайыннарыаҕыҥ диэтэ.
Бу күн «Мэҥэ Хаҥалас улууһа» МО грамотатынан «Мегинострой» тутуу кэпэрэтиибин каменщига Ким Прокопьев, олорор дьиэ-уот, коммунальнай хаһаайыстыба салаатын «Теплоснаб» тэрилтэтин силиэсэрэ Андрей Пинигин, доруобуйа харыстабылын үлэһитэ Елена Андреева, М.К.Попова аатынан Майатааҕы Оҕо ускуустубатын оскуолатын хаһаайыстыбаннай чааска сэбиэдиссэйэ Дмитрий Андреев, Махтал суругунан В.П.Ларионов аатынан Майа орто оскуолатын үлэһитэ Акулина Аянитова таһаарыылаах үлэлэрин иһин наҕараадаланнылар.
Үбүлүөйдээх тэрээһининэн бэйэлэрин эҕэрдэлэрин Майа сэлиэнньэтин дьокутааттарын сэбиэтин бэрэссэдээтэлэ Антонина Федорова, хомуньуустар ааттарыттан Анатолий Чичахов эттилэр.
Бырааһынньык күнүн Сардаана Осипова, эр дьон вокальнай ансаамбыллара ырыанан, «Үһүс көлүөнэ оскуолатын» литературнай куруһуогун бэрэстэбиитэллэрэ Майаҕа анаммыт ырыаларынан, хоһооннорунан, үҥкүүлэринэн киэргэттилэр.
Кырачааннарга анаан минньигэс кэмпиэттэри тарҕаттылар, түөлбэлэринэн көрдөөх-нардаах оонньуулар, куонкурустар ыытылыннылар, босхо сүүйүүлээх лотереялар оонньоннулар.
Д.Ф.Ходулов аатынан норуот айымньытын дьиэтигэр, «Кыталык» оҕо-ыччат эстетическэй киинигэр шоу-бырагыраамалар буоллулар. Майа уопсастыбаннай түмсүүлэрэ кэнсиэр көрдөрдүлэр, аныгы үгэһинэн флешмоб тэрийдилэр. Бырааһынньык салютунан түмүктэннэ.
Майа 115 сылыгар анаммыт тэрээһиннэр сыл устата ыытыллыахтара.
Виктория БЕЛОЛЮБСКАЯ