Быйыл сайын экэниэмикэ миниистирин э.т. анаммыт Майя Данилова кандидатуратын Ил Түмэн дьокутааттара өйөөтүлэр. Кини экэниэмикэ миниистиринэн ананна.
Майя Андреевна бу дуоһунаска ананыан иннинэ экэниэмикэ миниистирин бастакы солбуйааччынан үлэлии олорбута. Дьокуускайдааҕы үп техникумун, Саха судаарыстыбаннай университетын, Норуот хаһаайыстыбатын академиятын үөрэнэн бүтэрбитэ. Финансист, бухгалтер идэлээх. Аммаҕа, “ВТБ” бааҥҥа, Экэниэмикэ министиэристибэтигэр, Стратегическэй чинчийии киинигэр үлэлии сылдьыбыта.
Өрөспүүбүлүкэ социальнай-экономическай сайдыытын стратегията Майя Данилова быһаччы кыттыытынан оҥоһуллубута, билигин ситэриллэ сылдьар. Ону сэргэ, Майя Андреевна билигин Уһук Илин эрэгийиэннэр 2025 с. диэри сайдыыларын национальнай бырагыраамаларыгар үлэлэһиэхтээх. Ону таһынан, Ил Дархан Айсен Николаев бэлиэтииринэн, экэниэмикэ миниистирин быһыытынан Майя Данилова федеральнай бырагыраамаларга, национальнай бырайыактарга өрөспүүбүлүкэ интэриэһин көмүскүүр бырагыраамалары оҥорууну салайыахтаах.
Ыспыраапка:
Данилова Майя Андреевна
1975 с. ыам ыйын 9 күнүгэр Дьокуускайга төрөөбүтэ;
1997 с. – Амма улууһугар нолуок инспекциятыгар бухгалтер;
1999-2001 сс. – Экэниэмикэ министиэристибэтин сүрүннүүр, кылаабынай исписэлииһэ;
2001-2008 сс. – Экэниэмикэ министиэристибэтин управлениетын, департаменын салайааччыта;
2008-2009 сс. – “ВТБ” баан инвестиционнай операцияларга дириэктэрэ;
2009-2010 сс. – Экэниэмикэ министиэристибэтин департаменын салайааччыта;
2010 с. – СӨ бырабыыталыстыбатын бэрэссэдэтэлин бастакы солбуйааччытын секретариатын салайааччыта;
2010-2013 сс. – экэниэмикэ миниистирин солбуйааччы;
2013-2018 сс. – экэниэмикэ миниистирин бастакы солбуйааччы.
Аграфена КУЗЬМИНА, “Саха сирэ” хаһыат.