Саха сириттэн Сочи санаторийдарыгар, чуолаан «Аквалооҕа», сынньана тиийээччилэри биллэр фирма үлэһитэ, туристары сирдээччи анал гид Василий Стручков көрсөр, атаарар.
edersaas.ru
Василий Филиппович сүбэлээн сырытыннарар экскурсияларыттан биир умнуллубатынан уонна соһуччу үөрүүлээҕинэн 2014 с. ХХII кыһыҥҥы олимпиада ыытыллыбыт «Красная Поляна» диэн олимпийскай бөһүөлэккэ сылдьыы буолла.
Соһуччута диэн бу хайалаах бөһүөлэк инники сайдыытыгар уонна олимпиада кэмигэр ыалдьыттары кэрэхсэтиигэ саха талааннаах ыччата биллэр-көстөр улахан кылаатын киллэрбитин үгүспүт билбэккэ сылдьыбыппыт буолла. Ол курдук, «Краснай Полянаҕа» фуникулердарга тиийэр сиргэ харах хатанар, киһи дьиибэргии көрөр дьиэтэ турар. Бу эбийиэги саха талааннаах уола Максим Неймохов бырайыактаабыт!
Норуодунай суруйааччы Егор Неймохов сиэн быраата Максим Москваҕа МАРХИ-ны бүтэрэн баран, дойдутугар кэлэн үлэ көрдөөбүт да булбатах. «Градостроительство» дипломнаах эдэр киһи дойдутугар үлэ булбатаҕын истэн, бииргэ үөрэммит оҕолоро Москваҕа ыҥырбыттар. Онно кэлэн, Сочи Олимпийскай эбийиэктэрин бырайыактаспыт.
Максим Билигин Питергэ олорор.
Ийэ киэн туттуута
Сочи биир биллэр, кэрэ-бэлиэ, туристар кыһыннары-сайыннары тоҕуоруһар «Краснай Поляналарын» киинигэр турар бу эбийиэги өйдөөн көрдөххө, үөһээ өттүгэр төгүрүк курдук иһирдьэ киирэр баар. Ол иһигэр кууппалга дуу, ураһаҕа дуу, сир шарыгар дуу майгынныыр элэмиэн баара саха киһитин толкуйунан оҥоһуллубутун кэрэһилиир эбит.
Бу дьикти тутуулаах дьиэ иһигэр араас маҕаһыыннар, сынньанар сирдэр, быыстапкалыыр саалалар уо.д.а. үлэлииллэр.
Онон, «Краснай Полянаҕа» кэлэн, үрдүк хайаларга тахсан айылҕа умсугутуулаах көстүүлэрин көрүөххүт иннинэ Максим Неймохов бырайыагынан тутуллубут кыраһыабай дьиэ таһыгар хаартыскаҕа түһүҥ уонна уолбутунан киэн туттуоҕуҥ. Бу күннэргэ уол ийэтэ, Мэҥэ Алдан орто оскуолатын учуутала Татьяна Петровна уонна саҥаһа Мария Петровна (Егор Неймохов кэргэнэ) уолларын үлэтин көрө анаан-минээн «Краснай Полянаҕа» күүлэйдээн, дуоһуйан бардылар.
Максим Неймохов — СӨ «Барҕарыы», РФ «Саҥа ааттар» пуондаларын стипендиата, Дмитрий Лихачев талааннаах ыччаттарга олохтообут «Прометей сулуһа’’ уордьанын кавалера. Бу уордьанын Максим Нобелевскай бириэмийэ лауреата Жорес Алферовы кытта бииргэ ылбыта эмиэ сэдэх көстүү.
Максим дипломнай үлэтэ аан дойдутааҕы куонкуруска бастаабыт, Кыайыы 60 сылыгар архитектурнайга үөрэнэр устудьуоннар ортолоругар пааматынньыктар куонкурустарыгар эмиэ инники миэстэҕэ тахсыбыт. Ол бырайыага Подмосковьеҕа пааматынньык комплексыгар киирбит.
Максим оҕо сылдьан хартыыналарын ЮНЕСКО тойонугар Федерико Майорга, Борис Ельциҥҥэ, Алексий Второйга бэлэхтээбитэ.
Надежда ЕГОРОВА, «Саха сирэ» хаһыат, edersaas.ru