Малайзиялар «Хотугу кустукка» кэллилэр

Бөлөххө киир:

Бүгүн Дьокуускай аэропордугар Малайзияттан «Ксимпли Данс груп» үҥкүү ансаамбылын артыыстара көтөн кэллилэр. Ансаамбылы эдэр талааннаах хореограф Чиа Кай Ксиан салайан аҕалла.

Надежда ЕГОРОВА, «Саха сирэ» хаһыат, https://edersaas.ru/


Кинилэр кулун тутар 18-22 күннэригэр Мэҥэ Хаҥалас улууһун Майа сэлиэнньэтигэр ыытыллар «Хотугу кустук» аан дойдутааҕы VI фольклор бэстибээлин ыҥырыылаах ыалдьыттарынан буолаллар. Итии дойду үҥкүүһүттэрэ Саха сирин хаарын аан бастаан көрөр буоланнар, улаханнык үөрдүлэр, соһуйбуттарын кистээбэтилэр.

«Хотугу кустук» сыл аайы ыытыллар бэстибээлгэ оҕо, ыччат уонна улахан дьон вокальнай, хореографическай, инструментальнай кэлэктииптэрэ, дьоҕус тыйаатырдар уонна биирдиилээн дьон кытталлар. Кинилэр бары бэйэлэрин норуоттарын бырааһынньыктарын, үгэстэрин, оонньууларын уо.д.а. көрдөрүөхтэрэ.

Бэстибээл сүрүн сыалынан-соругунан Саха Өрөспүүбүлүкэтин ураты  фольклорун Арассыыйа уонна аан дойду таһымыгар тарҕатыы уонна билиһиннэрии буолар. Манна норуоттар култууралара бэйэ бэйэлэригэр чугасаһыахтара, истиҥник кэпсэтэн, саҥаттан саҥаны билиэхтэрэ. Аан дойдутааҕы тэрээһин суолтата олус улахан. Ол курдук, СӨ фольклорун кэлэктииптэрэ уонна солистара култуурунай-аһымал кэнсиэртэргэ 2011-2016 сс. элбэхтик кытыннылар. Кинилэр «Арассыыйа Колумбияҕа ыллыыр уонна үҥкүүлүүр», «Италияҕа ыһыах», «Колумбияҕа — Хотугу кустук» бырааһынньыктарга, ону сэргэ, Монголияҕа, Кубаҕа, Болгарияҕа, Германияҕа, Малайзияҕа, Донбасска, Москваҕа ыҥырыллыбыттара.

Бэстибээли Сибиир уонна Уһук Илин норуоттарын култууратын сайыннарыы «Хотугу кустук пуондата» (Москва) тэрийэр. Тэрээһин көмөлөһөөччүлэринэн уонна өйөөччүлэринэн СӨ култуура уонна духуобунай сайдыы министиэристибэтэ, Ньурба улууһун култуураҕа уонна ыччакка бэлиитикэтин департамена, СӨ үөрэх министиэристибэтин эбии үөрэхтээһин тэрилтэтэ, ЮНЕСКО үҥкүүгэ (CID) аан дойдутааҕы сэбиэтэ, искусство бүтүн аан дойдутааҕы ассоциацията (WAPA) буолаллар.

Быйыл Майаҕа ыытыллар бэстибээл чэрчитинэн «Саха сирин хаар оһуордара» үҥкүү уонна муода аан дойдутааҕы бэстибээлэ, маастар-кылаастар, «төгүрүк остуоллар» буолуохтара. Кулун тутар 22 күнүгэр «Арчы» дьиэтигэр омук ыалдьыттара кыттыылаах «Хотугу кустук» сулустара» кэнсиэр дьон-сэргэ сэҥээриитин ылыаҕа.

– «Хотугу кустугу» фольклор бэстибээллэрин Европатааҕы ассоциацията (ЕАФФ) Европа бэстибээллэрин реестрдэригэр киллэрбитэ элбэҕи этэр. Биһиги бу тэрээһиммит аан дойду стандартынан ыытыллар уонна кыттааччылар толорууларын таһымынан, хаачыстыбатынан уратылаах.

Бэстибээл бэйэтэ логотиптаах, Лэгэнтэй толоруутугар гиимнээх, Москва маастардара оҥорбут «Кустукчаана» диэн кубоктаах, – диэн «Хотугу кустук» бэстибээл дириэктэрэ, Сибиир уонна Уһук Илин норуоттарын култуураларын сайыннарыы пуондатын бэрэсидьиэнэ Александра Борисова кэпсээтэ.

ЫСПЫРААПКА:

«Хотугу кустук» аан дойдутааҕы фольклор бэстибээлэ аан бастаан 2012 с. Ньурба куоракка ыытыллыбыта. Онтон ыла ыалдьытымсах Ньурба сиригэр «Хотугу кустук» түөртэ ыытыллан кэллэ. Үбүлүөйдээх V-с тэрээһин 2016 с. Дьокуускайга далааһыннаахтык буолбута.

Надежда ЕГОРОВА, «Саха сирэ» хаһыат, https://edersaas.ru/

+1
0
+1
0
+1
0
+1
0
+1
0
+1
0
+1
0