«Мам, кинь на этот номер деньги. У меня серьезные проблемы. Утром все объясню», «Привет, любименький мой человечек! Я сейчас на вокзале. Мне прохожий дал телефон написать тебе смс, у меня на счете минус, не могу позвонить, мой номер +791…. Положи мне немножко для звонка тебе. Люблю» диэн СМС-иһитиннэриилэри үгүс киһи тутан соһуйан, сорохтор харчы уга охсубуттарын өйдөөбөккө хаалбыт буолуохтаахтар.
Анивера Акимова, «Саха сирэ» хаһыат, https://edersaas.ru
[vc_text_separator title=»» i_icon_fontawesome=»fa fa-volume-control-phone» i_color=»juicy_pink» i_size=»lg» color=»juicy_pink» style=»dashed» add_icon=»true»]
Билигин дьон барыта суотабай төлөпүөннээх. Сорохтор тэҥинэн «Билайн», МТС, «Мегафон», «Yota» оператордарга холботтороллор. Мин эмиэ икки оператор өҥөтүнэн туһанар буоламмын, күннэтэ араас хабааннаах СМС-иһитиннэриилэри тутабын. Ол быыһыгар хаста даҕаны массыына сүүйэн турардаахпын… Биирдэ, РФ Киин баанын аатыттан: «Ваша карта заблокирована. Все вопросы можно уточнить по телефону 8(909) …», – диэн иһитиннэрии кэлэн, улаханнык уолуйа сылдьыбыттааҕым. Ама, тоҕо эмиэ каартабын араардахтарай дии санаабытым. Ол эрээри, ыйыллыбыт нүөмэринэн эрийбэтэҕим.
Оттон билэр кыыспар: «Вам отказано в выдаче кредита банком Х», – диэн кэлбит. Аны аҕыйах хонугунан төлөпүөнүгэр эрийбиттэр уонна бааҥҥа кирэдьиитин иэһин төлүү охсоругар сүбэлээбиттэр. Төлөпүөнүнэн түөкүннээһиҥҥэ түбэспэт туһуттан, хайдах буолабыт диэн “Мегафон” Саха сиринээҕи филиалын исписэлиистэрин кытары кэпсэппиппэр, ханнык да түгэҥҥэ абонент бэйэтэ сэрэхтээх буолара ирдэниллэрин эттилэр. Саарбах ис хоһоонноох иһитиннэриилэри туппут киһи, бастатан туран, суотабай сибээс операторыгар эрийиэхтээх, эбэтэр хампаанньа офиһыгар кэлэн сайабылыанньа суруйуохтаах.
Сорох дьоҥҥо хаартыскаҕыт ханнык эрэ сайтка баар, киирэн көрүҥ диэн СМС-иһитиннэрии эмиэ кэлбит буолуохтаах. «Для Вас поступила открытка http://сайт.***.jar» диэн иһитиннэриини хаста даҕаны туппутум. Аан бастаан наһаа соһуйбутум. Онтон аахайбат буолбутум. Манна туһаайан, «Мегафон» Саха сиринээҕи салаатын пресс-сэкирэтээрэ Анатолий Трофимов: «Ссылканы загрузкалаамаҥ. Өскөтүн ыйыллыбыт ссылканы баттаатаххытына, эһиги java-бырагырааманы бэйэҕин төлөпүөҥҥүтүгэр хачайдыыгыт. Оччотугар араас СМС кэлэн, счеткутуттан аҕыйаҕа суох харчыны сүтэриэххитин сөп», – диэн сүбэлиир.
Суотабай төлөпүөннээх дьоҥҥо өссө электроннай СМС-тары мобильнай оператор аатынан сирэйдэнэн ыыталлара эмиэ баар. Үгүс өттүгэр тугу эмит рекламалаан, биитэр сүүйүүлээх оонньууга оонньотоору. Маннык ис хоһоонноох иһитиннэриилэргэ итэҕэйэн, төттөрү СМС ыыппат ордук. Өскөтүн эппиэттээтэххэ, биитэр итэҕэйэн харчы уктаххытына, төттөрүтүн хас да бүк ороскуотуран тахсаҕын.
Анивера Акимова, «Саха сирэ» хаһыат, https://edersaas.ru/