Бүлүү Тыымпытыгар Саха АССР спордун маастара, Бүлүү улууһун уонна Үөһээ Бүлүү улууһун Үөдүгэй сэлиэнньэтин Бочуоттаах гражданина Выбор Быкалыров кэриэһигэр хапсаҕайга өрөспүүбүлүкэтээҕи турнирга барыта 140 бөҕөс кыттыыны ылла.
Эр дьоҥҥо 62 киилэҕэ спорт маастара Владислав Левчиков кэнниттэн иккис миэстэлэммит Андриан Никифоров балаһыанньа быһыытынан маастар буоларга баал ылла. Уолаттар бөлөхтөрүгэр олохтоохтор эрэллэрэ, бу сайын “Азия оҕолоро” норуоттар икки ардыларынааҕы 6-с спортивнай оонньуу кыайыылааҕынан тахсыбыт Сергей Каратаев чөмпүйүөн үрдүк аатын төрдүс төгүлүн ылан, биир дойдулаахтарын үөртэ.
Ити курдук, “Азия оҕолоро” оонньуу призердара Сергей Иванов уонна Руслан Максимов бириистээх миэстэлэргэ тигистилэр. Манна даҕатан эттэххэ, уолаттар бөлөхтөрүгэр бастаабыттарга – салгынынан эстэр саалар, оттон эр дьоҥҥо кыайбыттарга – сахалыы сиэдэрэй быһахтар бириис быһыытынан туттарылыннылар.
Турнир сүрүн спонсорынан “Киэргэ” фирма (генеральнай дириэктэр А.К.Павлов) буолла. Санатан эттэххэ, Александр Кириллович ийэтэ Дарья Алексеевна бырааттыы Быкалыровтар улахан эдьиийдэрэ. Күрэхтэһии кэмигэр 2012 сыллаахха тутуллан үлэҕэ киллэриллибит спортивнай саалаҕа – Выбор уонна Степан Быкалыровтар ааттарын иҥэрии сиэрэ-туома ыытылынна. Выбор хапсаҕайдьыт эбит буоллаҕына, кини быраата Степан 1973 сыллааҕы Манчаары спартакиадатын мас тардыһыыга муҥутуур кыайыылааҕа.
Олохсуйбут үгэс быһыытынан сүрүн күрэхтэһии кэнниттэн муҥутуур кыайыылаахтары быһаарар түһүлгэ тэрилиннэ. Онуоха эр дьоҥҥо 17 бөҕөс суруйтарбытыттан, бүтэһик быһаарыылаах хапсыһыыга соторутааҕыта көҥүл тустууга РФ спордун маастарын нуорматын толорбут Евгений Габышевы хотон, кыайыылааҕынан өрөспүүбүлүкэ түөрт төгүллээх призера, спорт маастара Рустам Прокопьев ааттанна уонна 25 тыһыынча солкуобайдаах сертификатынан наҕараадаланна. Оттон уолаттарга 21 бөҕөс күөн көрүстэ. Түмүккэ, Дьокуускайтан Александр Алексеев – Вани Гоголевы охторон, бастакы миэстэни ылла уонна сотовай телефонунан наҕараадаланна.
-Быйылгы сылга Выбор Быкалыров аатынан хапсаҕайга күрэхтэһии Манчаары спартакиадатын көрсө бастакы улахан турнир буолла, — диир күрэхтэһии комментаторынан үлэлээбит суруналыыс Александр Васильев-Көрдүгэн. – Ыйааһын бары кыайыылаахтара “Киэргэ” фирма уустара боруонсаттан кутан оҥорбут бэртээхэй мэтээллэрин кэппиттэрэ сонуннук көһүннэ. Мантан салгыы алмаастаах Мирнэйгэ Аркадий Никифоров, ол кэнниттэн Покровскайга “Хаҥалас хапсаҕайа”, Намҥа Николай Румянцев, Бүлүүгэ Василий Румянцев уонна Чурапчы Чакырыгар суруйааччы Эрилик Эристиин төрөөбүтэ 125 сылыгар анаан Чакыр маастардарын, о.д.а. турнирдар ыытыллыахтара. Манна даҕатан эттэххэ, Манчаары спартакиадатыгар уолаттарга, эдэрдэргэ, бэтэрээннэргэ ыйааһын аайы 16-лыы бөҕөс кыттыаҕа. Путевкалары былдьаһыы улахан дьоҥҥо уонна бэтэрээннэргэ Петр Алексеев аатынан өрөспүүбүлүкэ чөмпүйэнээтигэр, оттон уолаттарга “Эрчимэн Бэргэн” түһүлгэтигэр ыытыллыа.
Күрэхтэһии түмүк көрдөрүүтэ:
Эр дьоҥҥо
55 кг (6 кыттааччы): 1. Сергей Александров (Балаҕаччы), 2. Иван Лопатырев, 3. Александр Егоров (иккиэн Үөһээ Бүлүү).
62 кг (15): 1. Владислав Левчиков (Мукучу), 2. Андриан Никифоров (Үөһээ Бүлүү), 3. Ньургустан Николаев (Мастаах).
70 кг (14): 1. Семен Тимофеев (Үөһээ Бүлүү), 2. Дмитрий Ушницкай (Бүлүү), 3. Егор Иванов (Үөһээ Бүлүү).
80 кг (11): 1. Рустам Прокопьев (Үөһээ Бүлүү), 2. Афанасий Матвеев (Бүлүү), 3. Гаврил Саввинов (Үөһээ Бүлүү).
90 кг (8): 1. Платон Саввинов (Үөһээ Бүлүү), 2. Павел Николаев (Мукучу), 3. Клим Иванов (Бүлүү).
+90 кг (7): 1. Николай Никифоров, 2. Михаил Нехоруков (иккиэн Ньурба). 3. Эльдар Алексеев (Үөһээ Бүлүү).
Уолаттарга
50 кг (18): 1. Ньургун Тобонов (Ньурба), 2. Вася Софронов, 3. Сергей Кетехов (иккиэн Үөһээ Бүлүү).
55 кг (23): 1. Прокопий Григорьев (Мастаах), 2. Сергей Иванов (Үөһээ Бүлүү), 3. Сергей Степанов (Ньурба).
62 кг (17): 1. Ньургун Терентьев (Үөһээ Бүлүү), 2. Аян Каратаев (Бороҕон), 3. Петр Степанов (Мукучу).
70 кг (10): 1. Сергей Каратаев (Тыымпы), 2. Аян Петров (Ньурба), 3. Радомир Осипов (Тааһаҕар).
80 кг (4): 1. Вани Гоголев (Үөһээ Бүлүү), 2. Айтал Волков (Бүлүү), 3. Руслан Максимов (Дьокуускай).
+80 кг (5): 1. Александр Андреев (Ньурба), 2. Егор Руфов (Үөһээ Бүлүү), 3. Александр Алексеев (Дьокуускай).
Петр ПАВЛОВ, «Саха сирэ» хаһыат, edersaas.ru
Ааптар хаартыскаҕа түһэриитигэр: “Азия оҕолоро” оонньуу хапсаҕайга чөмпүйүөнэ, Выбор Быкалыров турнирын 4 төгүллээх кыайыылааҕа Сергей Каратаев.