XX-с төгүлүн ыытыллар үбүлүөйдээх Манчаары оонньуулара от ыйын 6-10 күннэригэр Үөһээ Бүлүүгэ буолар. Улуустар, хамаандалар бэлэмнэрэ күргүөмнээхтик бара турар. Спортсменнар күрэхтэһиигэ төһө бэлэмнэрин, тус сыалларын туоһуластыбыт. edersaas.ru
Андрей Пугачев, Чурапчы улууһун хамаандатын чилиэнэ, мас тардыһыытыгар Саха Өрөспүүбүлүкэтин спордун маастара:
— Манчаары оонньууларыгар бэлэмнэнии күүстээхтик бара турар, ыам ыйыгар ыарахан сүрүн дьарыктар саҕаланнылар. Бэйэм 65 киилэҕэ өрөспүүбүлүкэ чемпионатыгар иккис миэстэни буолан, Манчаарыга путевка ылбытым. Билиҥҥи уопсай туругум, ыйааһыным үчүгэй. Ыйааһыммар мас тардыһыы лидердэрэ киирсэллэр дии саныыбын, тоҕо диэтэр бэлэмэ, дьарыга суох киһи Манчаары оонньууларыгар кыттыбат. Улууспут хамаандатын бэлэмнэниитэ бара турар, кэлэр ыйга бүтэһик хомуурбут саҕаланар.
Егор Протопопов, Хотугулуу-Илиҥҥи федеральнай университет хамаандатын чилиэнэ, билигин ХИФУ магистрана, тутум эргииргэ өрөспүүбүлүкэ рекордсмена:
— Мин Манчаары оонньууларыгар национальнай пятиборье көрүҥҥэ университетым хамаандатын аатыттан күрэхтэһэбин. Бэйэм мас тардыһыытынан эрчиллэбин. Бу оонньуу курдук улахан таһымнаах күрэхтэһиигэ бастакы холонуум буолар. Мин санаабар, пятиборье курдук көрүҥҥэ ситиһиилээхтик киирсэргэ тулуур, уһун тыын, кыайыыга дьулуһуу уонна күүстээх дьаныар наада, чэпчэки атлетиканан дьарыгырар спортсменнар көрүҥнэрэ. Тренерым Михаил Ильич Борохин салалтатынан утумнаахтык эрчиллэ сылдьабын. Санаам күүстээх, туох баар күүспүн – уохпун ууран туран кыайыыга дьулуһуом уонна мантан кынаттанан салҕыы дьарыкпын тохтоппокко улахан түһүлгэлэргэ киирсэн иһэр санаалаахпын. Хамаандабыт бэлэмэ үчүгэй, хомуурдар буолаллар.
Андрей Захаров, Бүлүү улууһун хамаандатын чилиэнэ, көҥүл тустууга Арассыыйа спордун маастара, хапсаҕайга Саха сирин спордун маастара:
— Бэлэм кэминэн баран иһэр. Билигин хапсаҕайга күрэхтэһиилэрбит бүтэннэр, бэйэм, төһө кыалларынан, араас көрүҥнэргэ күрэхтэһиилэргэ кытта сылдьабын. Ааспыт өрөбүллэргэ Владивосток куоракка ыытыллыбыт гректии-римнии тустууга балыырга түбэһэн, иккис миэстэ буолан хааллым. Бэс ыйыгар «Ердынские игры» бүрээт норуотун хапсаҕайыгар баран Манчаары оонньууларын иннинэ “старт” оҥоруом диэн былаанныыбын. Ыйааһыным 64 киилэ, өссө кыратык эбэ түһүөхпүн баҕарабын. Мин киирсэр ыйааһыммар — 62 киилэҕэ лидердэр кэккэлэригэр Үөһээ Бүлүү бөҕөһө Егор Иванов баар, ааспыт өрөспүүбүлүкэ чөмпүйэнээтигэр кыайбыта. Улууспут бэлэмэ үчүгэй буолуохтаах, мин сотору–сотору онно-манна барар-кэлэр буоламмын бу диэн сибээстэспэккэ сылдьабын.
Андрей Васильев, Таатта улууһун хамаандатын чилиэнэ, атах оонньуутугар Саха Өрөспүүбүлүкэтин спордун маастара, куобахтаан ыстаныыга өрөспүүбүлүкэ рекордсмена:
— Манчаары оонньууларыгар бастакы холонуум буолар. Мин атах оонньуутунан дьарыктаммытым төрдүс сыла буолла. Бэйэм 2016 сыл күһүнүгэр ыытыллыбыт Таатта улууһуттан бастакынан Саха сирэ уонна Арассыыйа спордун маастара буолбут Гаврил Григорьев бирииһигэр күрэхтэһиигэ куобахтаан ыстаныыга өрөспүүбүлүкэ рекордун олохтообутум. Онно 41 м 23 см ойбутум. Быйыл атах оонньуутун таһыма Саха сиригэр биллэ үрдээтэ. Бастакы үс миэстэлэри биллэр-көстөр спортсменнар Егор Филиппов, Виталий Васильев, Кай Адамов, Иван Пестряков, Георгий Шергин уонна Мичил Яковлев былдьаһаллара буолуо. Тренердэрим Захар Ефремов уонна Виталий Васильев салалталарынан утумнаахтык эрчиллэбин. Сүрүн сыалым — куобахтаан ыстаныыга Арассыыйа рекордун — 41 м 97 см куоһарыы уонна троеборьеҕа үс бириистээх миэстэҕэ киирии. Таатта улууһун хамаандата оонньууга бэлэм, үп-харчы көрүллэр, хомуурдары бэйэбит тэрийэбит.
Николай ПОПОВ, edersaas.ru