Манчаары ХХ спартакиадатын ыытыыга, билиҥҥитэ, иһит-хомуос, орон өттө кыайтарбакка турар курдугун иһин, ол быһаарыллар боппуруос буоларын хамыыһыйа чилиэннэрэ билиннилэр.
Петр ПАВЛОВ, “Саха сирэ” хаһыат, https://edersaas.ru
2017 сыл саамай улахан күрэхтэһиитинэн спорт национальнай көрүҥнэригэр Манчаары ХХ спартакиадата буолуоҕа. Спартакиада от ыйын 6-10 күннэригэр Үөһээ Бүлүүгэ ыытыллара былааннанар. Бу улахан тэрээһиҥҥэ бэлэмнэнэн, Үөһээ Бүлүүгэ чэпчэки атлетикаҕа манежтаах стадион, спортивнай комплекс, ипподром, оттон Нам сэлиэнньэтигэр спортивнай былаһаакка тутулла тураллар.
Бу спартакиаданы бэлэмнээн уонна тэрийэн ыытыы – Спорт национальнай көрүҥнэригэр өрөспүүбүлүкэтээҕи киин сүрүн соруга. Дьэ ол иһин, бэлэмнэнии хаамыытын билсэ таарыйа Спорт миниистирин бастакы солбуйааччы Семен Чердонов салайааччылаах 15 киһилээх бөлөх спартакиада ыытыллыахтаах улууһугар – Үөһээ Бүлүүгэ тиийэн үлэлээтэ.
Бөлөххө өссө “Модун” спортивнай комплекс дириэктэрэ, Ил Түмэн дьокутаата Иннокентий Григорьев, СӨ Үөрэххэ уонна наукаҕа миниистирин солбуйааччы Эдуард Кондратьев, Манчаары спартакиадатын кылаабынай судьуйатынан анаммыт Физическэй култуура уонна маассабай спорт управлениетын начаалынньыгын солбуйааччы Семен Говоров уонна “Модун” исписэлиистэрэ киирэн үлэлээтилэр.
-Үбүлүөйдээх спартакиада хаһаайыттара – үөһээ бүлүүлэр бэлэмнэнии үлэтин саҕалаабыттар, — диир “Модун” спортивнай комплекс дириэктэрэ Иннокентий Григорьев. – Кинилэр бу улахан тэрээһини үрдүк таһымнаах ыытарга баҕалаахтарыттан киһи санаата көтөҕүллэр. Бастаан Харбалаах, Тамалакаан, Ороһу, Нам сэлиэнньэлэригэр сылдьан спартакиада кыттыылаахтарын түһэрии уонна аһатыы миэстэлэрин көрдүбүт. Хайдах бэлэмнэниэхтээхтэригэр, тугу гыныахтаахтарыгар сүбэ курдук инструктаж биэрдибит. Уопсайынан, икки бөлөҕүнэн хайдыһан, икки күн Үөһээ Бүлүү улууһун дьаһалтатын баһылыга Владимир Семенович Поскачин кыттыылаах сэттэ нэһилиэги кэрийэн көрдүбүт. Ыарахаттар син бааллар даҕаны, көннөрүллэр кыахтаахтар. Ол курдук, иһит-хомуос, орон тиийбэт курдук эрээри, ити быһаарыллар боппуруос. Спартакиадаҕа анаан тутулла турар эбийиэктэргэ үлэ ыытыллыыта болдьох быһыытынан баран иһэр эбит. Ордук Кэнтиккэ бэлэмнэнии үчүгэйдик баран иһэрин бэлиэтээтибит. Маннык сырыы үгэс быһыытынан олохтоох салайааччылары, үлэһиттэри кытта көрсөн уопсай мунньахтааһынынан түмүктэннэ. Онно үлэ уопсай хаамыытын ырытыстыбыт, кыһалҕалары быһаарыстыбыт, инники соруктарга тохтоотубут. Итиэннэ, бэлэмнэниини, сөптөөхтүк баран иһэринэн сыаналаатыбыт.
Петр ПАВЛОВ, https://edersaas.ru
Владислав КОРОТОВ хаартыскаҕа түһэриилэрэ.