Ааптар: Надежда ЕГОРОВА, «Саха сирэ» хаһыат, edersaas.ru
Ааптар: Бары бииргэ мустубучча, Маргарита Борисованы дьахтар, артыыска, дьүөгэ быһыытынан арыйан көрөбүт дуо?
Елизавета Потапова: Биһиги Ритабыт, бастатан туран, ураты минньигэс астаах хаһаайка. Көрөөччүлэргэ аналлаах бырааһынньыктааҕы туруоруулар кэннилэриттэн үлэбит түмүгүн таһааран, кэлэктиибинэн Саҥа дьыллыыр үтүө үгэстээхпит. Бырааһынньыкпытыгар дьиэ кэргэттэрбитин, чугас доҕотторбутун ыҥырыахпытын сөп. Остуолунан араас тиэмэлээх куонкурустар буолаллар. Биһиги хампаанньаҕа Рита баар буоллаҕына, саамай ыалдьытымсах уонна баай-талым астаах остуолунан үксүгэр биһиэнэ буолааччы. Кини хайаан да ким да астаан көрө илик сонун минньигэс бүлүүдэлээх кэлэр. Бүлүүдэлэрин аатынан да «былааһы ылар». Холобур, «Чыҥыс Хаан» эбэтэр «Чыҥыс Хаан кистэлэҥэ» диэн бүлүүдэлэрин кистэлэҥин ким билиэн баҕарыа суоҕай?
Маргарита Борисова: Ээ, дьиҥинэн, иһэ боростуой ээ… (кыргыттар күлэн тоҕо бараллар, дьүөгэлэрин диэки соһуйбуттуу көрөллөр).
ЕП.: «Жульен» диэн салаат баарын аан бастаан Ритаттан билбиппит. Хата билигин мин бэркэ оҥорор буоллум.
Күүтүүлээх лотереябыт сүүйүүтэ дьэ, бу күн оонньонор. Санаабытыгар, ким эрдэ кэлбиккэ эрэ сүүйүүлээх билиэт түбэһэр курдук. Ардыгар эрдэ бүтэн хаалан хомотор. Ол иһин, Ритабыт илиитэ бааттаах диэммит наар кининэн ылларабыт. Оҕус сылыгар биир остуолга олорооччулар ким да ордубакка, бары тугу эрэ сүүйэн, үөрэн-көтөн турардаахпыт. Ол билиэттэри барытын Рита тардыбыта.
МБ.: Итинник киһиргэтэн ыллараллар. Ол аайы үчүгэй илиилээх аатыраммын эрдэ бара сатыыбын.
Надежда Ушницкая: Артыыстарбыт бары Рита асчытын билэллэр. Гастролларга Рита бөлөҕөр түбэспит киһи аска абыранар, айахпытын атыахпыт эрэ кэрэх (күлсүү кытаанаҕа). Биһиги, диеталаары бэйэбититтэн көҥөнөн аҕыйах астаах барбыт дьон, сэмээр Ритабыт тугу хостуурун кэтэһэн олорор буолабыт. Ол сылдьан, бары кэриэтэ киниттэн астыырга үөрэннибит. Театрбыт артыыстара, уопсайынан, илиилэригэр талааннаахтар. Иистэнньэҥнэрин көрүө этигит. Арай биирдэ быысапкаһыттар үлэлэрин көрүү буолбута. Көҕөн көттөҕүнэ көппөх көтөр дииллэринии, мин эмиэ боруобалаан көрбүтүм да, ким да «сээн» диэбэтэҕэ (эмиэ күлэн сыһыгыраһаллар). Оттон Риталаах Лиза улахан да улахан сыттык хаатын быысапкалаабыт этилэр.
МБ.: Ээ, мин эмиэ саппай уобустаҕым дии. Театрга быыстапка буолбутугар Лиза, София Баранова, Лена Сергеева-Румянцева, кадр отделын, бухгалтерия уо.д.а. отделлар кэрэ аҥардарын үлэлэрин көрүө этигит! Биир идэлээхтэрим талааннарын онно сөҕөн турардаахпын.
Надя сатаан быысапкалаабаппын диир да, ол оннугар күрүчүөгүнэн баайарга кимиэхэ да иннин биэрбэт. Сиэн кыргыттарыгар бэртээхэй суумка, бэргэһэ, шарфик баайбыт буолар. Ити курдук, гастролларга бэйэ-бэйэбититтэн элбэххэ үөрэнэбит.
ЕП.: Уопсайынан, Маргарита сахалыы ис куттаах. Айаҥҥа сиэри-туому булгуччу тутуһар. Айылҕаны кытта сатаан алтыһар, кинини араҥаччылыыр туох эрэ күүс баарыгар итэҕэйэбит. Гастролларга араас усулуобуйалар, кутталлаах да быһылааннар баар буолаллар. Ону Ритабыт сахалыы сайаҕас санаатынан, ис кутунан орун-оннугар сааһылаан, быһааран кэбиһэр. Кини баар буоллаҕына, хайдах эрэ эрэх-турах сананабыт, туох да мүччүргэнэ суох сылдьан кэлэбит.
Ааптар: Үһүөн бэйэ-бэйэҕитигэр маарыннаһаргыт наһаа элбэх курдук.
НУ.: Мин оҕом Риталаах Лизаны наһаа майгыннатан: «Икки Лиза, икки Рита» диир этэ. Маарыннаспаттарын туһунан этэ сатыырым үрдүнэн: «Суох. Эн миигин буккуйума. Иккиэн үүт-үкчүлэр», – диэччи. Бэл, бу соторутааҕыта Лиза телевидениеҕэ «Кэл, олор, сэһэргэһиэх» саҥа биэриигэ тахсыбытыгар «Ритаҥ кэлэн олорор», – диэн иннин биэримээри гынар.
МБ.: Баҕар, атын дьон, оҕолор буккуйаллара буолуо. Оннооҕор бэйэлээх бэйэбит театрбыт иһигэр ардыгар буккуйаллар ээ. Биллэн турар, кырасаабыссаҕа майгыннаталларыттан үөрэбин, саха тэҥэ суох сананабын (күлэн тоҕо бараллар). Дьиҥэр, уҥуохпунан Лизаттан кырабын.
Иккиэммитин майгыннаталларын мин аан бастаан өссө кыыһым олох кыра эрдэҕинэ билбитим ээ. Ханнык эрэ тэрилтэҕэ испэктээкилтэн быһа тардыы көрдөрө дуу, хоһоон ааҕа дуу барбыппыт. Онно кыыһым быыстапкаҕа Лиза «Чучунаа» испэктээкилгэ түспүт хаартыскатын көрөн баран: «Мама, мама, здесь ты», – дии-дии ырбаахыбыттан тардыалыыр, уоһа ыпсыбат буола үөрбүт. «Нет, доченька, эта другая актриса», – диэбиппэр эмиэ иннин биэрбэтэҕин өйдүүбүн.
Артыыстар харах далыгар сылдьар уонна элбэхтик гастроллуур буоламмыт, биһигини билэр киһи элбэх. Онон уулуссаҕа, уопсастыбаннай миэстэлэргэ дороооболоһон, эйэргээн аастахтарына, ардыгар кыбыста саныыгын. «Ити кими билбэтим? Ханна эрэ гастролга сылдьан хоммут, маанылаппыт киһибит дуу?» – диэн толкуйга түһэбин уонна кыбыстабын. Онон, уулуссаҕа тохтоон кэпсэттэхтэринэ, билиим да билимиим, үөрэ-көтө эйэргэһэбин. Ол кэпсэтэ туран өйдөөн кэлэбин. Эйигин кытта сирэй билсибэтэхтэрин да иһин, артыыс диэн убаастаан дорооболоһор дьон элбэх буолар. Ол эмиэ үөрүүлээх.
НУ.: Оннук ээ. Ардыгар түспүт ыалбыт дьоно киэһэ кулуупка таҥнан-симэнэн кэллэхтэринэ, билиэ суохпутун сөп. Киэһэ хонукпутугар кэлэн баран хомойбуттуу: «Хайа, испэктээкилгэ кэлбэтигит дуо?» – диэн ыйытааччыбыт.
Ааптар: Артыыстар кыраһыабайгытын бэйэҕит билэр бөҕө буоллаххыт. Биир билэр киһим эппитинии, ону хайдах «уйан» сылдьаргыт буолла?
НУ.: «Кыра эрдэҕинэ кыраһыабай оҕо – бүрэтик, оттон бүрэ оҕо тупса улаатар» – диэн кырдьаҕастар этээччилэр дии. Миигин кыра эрдэхпинэ наһаа кыраһыабай диэн быһа этэн кэбиспиттэр быһыылаах, кэлин дьүһүммүттэн астыммакка улаханнык хомойбут түгэннээхпин өйдүүбүн. Холобур, Лизаны хаартыскаҕа көрдөххө, кыра сылдьан бып-быллаҕар, кута-мата, хап-харачаас кыыс оҕо эбит (эйэлээх күлсүү), оттон билигин хайдах курдук кырасаабыссаный?
МБ.: Надя, эн сценаҕа устан таҕыстаххына, саала иһэ хайдах иһийэ түһэрин, чуолаан эр дьон уҥа-таала сыһарын көрүөҥ этэ. «Дорогуунап Ньукулайга», «Улуу Кудаҥсаҕа» хайдахтаах уобарастар этэй?
ЕП.: Маргарита Борисова диэн артыыс ка сэргэх сэбэрэлээҕин кэрэхсээн кэпсииллэрин эрдэттэн истэр этим. Биирдэ Ньурбаҕа кэлэ сырыттахтарына Амакинка таһыгар көрсөн сөхпүппүн-махтайбыппын өйдөөн хаалбыппын.
МБ.: Миигин кыра эрдэхпинэ хаһан да кэрэ сэбэрэлээххин диэбэт этилэр. Тоҕо диэтэххэ, бииргэ төрөөбүт эдьиийдэрим көрүөхтэн кэрэ дьүһүннээхтэрэ. Аймахтарым ортолоругар саамай боростуойдара, маралара мин этим. Бэл миигин ииппит убайым: «Ийэҥ эйигин ыарыһах, бүрэ дьүһүннээх кыыс диэн миэхэ биэрбитэ дии саныырым», – диэн күлэрэ. Ыарыһах буолан, киһи хараҕар быраҕыллыбат оҕо үһүбүн.
Кыраһыабайа суохпун билинэ улааппытым эмиэ да үчүгэй ээ. Артыыстары биһиги идэбит уонна көрөөччүлэрбит кыраһыабай, кэрэ оҥороллор дии саныыбын. Кими да «куһаҕан баҕайы артыыска» дииллэрин хаһан да истибэппин. Талаан эмиэ киһи тус бэйэтин эрэ өҥөтө буолбатах. Үөһэттэн бэриллибит талааны таба туһаныахха, сатаан кырыылыахха, күлүмүрдүү сылдьар күндү тааска кубулутуохха наада. Ол артыыстан бэйэтиттэн тутулуктаах.
Уопсайынан, мин дьүөгэлэрбин наһаа таптыыбын, махтанар уонна махтаныах түгэннэрим элбэхтэр. Холобур, иккиэн көрүстэллэр эрэ сиэннэрин туһунан кэпсэтиэхтэрин наһаа баҕараллар, кэпсэтэллэр даҕаны. Ол гынан баран, миигин харыстыыллар эбит этэ. Тоҕо диэтэххэ, оччолорго мин сиэним суоҕа. Туттуна сатаан баран, сиэннэрин туһунан кэпсэтэллэригэр мин хайдах сыһыаннаһарбын ыйытан тураллар. Дьэ, ол сиэннэрин туһунан кэпсэтэн-кэпсэтэн, миэхэ эмиэ сиэн сытын аҕаллахтара, бэйэлэригэр тардан ыллахтара дии. Күн сиригэр сиэн кэлэр дьоллоох күнэ тосхойбута. Онон отучча сыл бэйэ-бэйэбитин кытары чугастык алтыһан, ньэммитин билистибит, үөрүүбүтүн-хомолтобутун тэҥҥэ үллэстэн кэллибит.
НУ.: Биһигини сибээстиир элбэх. Бэйэ-бэйэбитин наһаа суохтаһабыт. Арыт ыйы-ыйынан арахсыбыппыт да иһин, көстүбэт күүс биһиги сыһыаммытын өссө бөҕөргөтөр курдук. Үһүөн толорута суох дьиэ кэргэҥҥэ иитиллибиппит. Ийэтэ суох улааппыт киһи дьахтар, ийэ истиҥ сыһыаныгар наадыйара хайа да сааһыгар уостубат буолар эбит. Оҕо сааскар ылбыт охсууҥ оспот бааска кубулуйан, чэрдийэн хаалар. Бииргэ төрөөбүттэргин кытары сатаан аһаҕастык кэпсэтиэ суоххун сөп, син биир бэйэҥ курдуктар буоллаҕа. Ол оннугар дьүөгэлэргин кытары кистэлэҥҥин төһө баҕарар үллэстэҕин. Баҕар, ол иһин биһиги наһаа чугаспыт, бэйэ-бэйэбитин тыл аҥарыттан өйдөһөрбүт буолуо. Араас улууска улааппыппыт эрээри, дьылҕабытыгар наһаа элбэх маарыннаһар баар. Оҕолорбут, сиэннэрбит тэҥҥэ улааттылар.
Лиза майгыта аммалыы сымнаҕас, Рита ньурбалыы наҕыл, тулуйумтуо. Мин көнөтүнэн сылдьарбын сөбүлүүбүн, кыратык ньоҕойбун, өһүргэспин – бары куһаҕан барыта мустубут. Антиреклама – эмиэ бэйэтэ реклама (күлэн тоҕо бараллар).
Ааптар: Эн этэр ити хаачыстыбаларыҥ талааннаах дьоҥҥо элбэхтик көстөр диэччилэр.
Бары: Ээ, оннук буоллаҕа (күлэ-үөрэ ытыстарын таһыналлар).
НУ.: Дьүөгэлэрбин иккиэннэрин олус күүскэ таптыыбын. Өр көрсүбэтэхпитинэ, ахтыһан аҥарбыт эрэ хаалар. Рита барыбытыгар, сиэннэрбитигэр тиийэ, хайаан да кэһиилээх, илии тутуурдаах, өттүк харалаах сылдьар идэлээх. Тугу эмэ түһээтэхпинэ, бастакынан Ритаттан ыйытабыт. Кини түүлбүтүн тойонноон биэрэр. Уоскутар, алы гынар.
Ааптар: Өссө биир уопсайгыт – бары киинэҕэ уһуллар артыыстаргыт дии?
ЕП.: Артыыс киһиэхэ телегеничность диэн баар. Холобур, мин бэйэбин оннуктарга киллэрбэппин.
Таһымнаахтык устар уопуттаах дьону кытары үлэлиириҥ эйиэхэ элбэҕи биэрэр. Урукку артыыстары оператордар ханнык баҕарар балаһыанньаҕа кыраһыабай гына сатаан усталлара. Эн ыарыһаҕы, тоҥхойо кырдьыбыт эмээхсини да оонньоо – көрөөччүгэ тас көрүҥҥүнэн сөбүлэтэриҥ курдук усталлара. Рита «Төлөммөтөх иэс» киинэҕэ режиссер көмөлөһөөччүтүнэн үлэлээбитин бэлиэтиэм этэ. Киинэҕэ элбэхтик уонна ситиһиилээхтик оонньообут артыыска диэх курдук, уоту-күөһү туттууну, саҥабыт хайдах иһиллэрин, таҥаспытын-саппытын кыраҕы хараҕынан көрөр эбит. Билигин талааннаах дьоҥҥо күөх уот умайда ээ. Рита, эн ити хайысханан салҕыы тоҕо үлэлээбэккин? Ханнык эрэ тиэмэни таба тайанан, айар дьоҕурдаах дьону түмэн, режиссер быһыытынан үлэлиир кыахтаах эбиккин.
НУ.: Театрга ханнык баҕарар испэктээкилгэ, бэйэбит туруорар үлэлэрбитигэр бары хайаан да Риталыын сүбэлэһэбит. Атын артыыс туораттан көрөн, элбэҕи этэн биэрэр кыахтаах. Хомойуох иһин, ону артыыс эрэ барыта аһаҕастык эппэт. Оттон Ритаттан көрдөстөххө, кини хайаан да ханнык эрэ эридьиэстэри, кыра да сыыһа-халты туттууну-хаптыыны булбут буолар уонна ону ылыннарыылаахтык быһааран биэрэр дьоҕурдаах. Ону эн бэйэҥ оонньуу сылдьан билбэтэх, суолта биэрбэтэх буолаҕын. Рита биһиги майгыбытын билэрэ бэрт буолан, киһини өлө өһүргэппэт гына, итэҕэспитин ытыс үрдүгэр ууран биэрэр. Биһиги үһүөн бэйэ-бэйэбитигэр итинник көмөлөсүһэбит.
МБ.: Надежда хас биирдии артыыс көрсөр түгэнин таарыйдыҥ. Испэктээкил буолаары эрэ турдаҕына эмискэ саҥа сценалар киллэриллэр эбэтэр оонньуу сылдьыбыт киһини атын артыыс солбуйар түгэннэрэ баар буолаллар. Ону артыыс да, көрөөччү да атыннык көрсөр: уларыйбыт артыыһы ылыныан эбэтэр ылынымыан сөп. Иккиһинэн, режиссер эйиэхэ болҕомто уурбакка хаалара кистэл буолбатах. Холобур, юбилейдаах бырагыраама буоллаҕына, кини сүрүннээн юбилейдаах артыыһы кытта үлэлиир.
НУ.: Василий Фомин режиссердуур эрдэҕинэ, кыра оруол, төттөрүтүн, элбэх бириэмэни ылааччы. Оруол – саҥа киһи төрөөһүнэ. Артыыс дьоҕура классикаҕа хайдах оонньууруттан биллэр. Артыыс аныгы испэктээкиллэргэ төһө баҕарар оонньуон сөп, онтон классикаҕа кэлэн бүдүрүйэр буоллаҕына, кини талаанын туһунан этэр ыарахаттардаах…
МБ.: Биирдэ Ньурба театра гастроллуу кэлбитигэр биир дойдулаахтарбын көрөөрү испэктээкилгэ кэллим. Арай онно Лиза кэргэнэ Семен Слепцов тахсыбытыгар саала иһэ хайдах суугунаһа түспүтүн, уҥа-таала таптаабытын көрүө этигит! Киниттэн атын артыыһы кими да көрбөттөр. «Наара суохха» Баачыканы оонньообут артыыс элбэх да, Семен Слепцовы итиннэ көрүөхпүттэн ыла кини айбыт уобараһа мин өйбүттэн тахсыбат.
Ааптар: Өссө Опера уонна балет театрыгар баар эрдэххитинэ үчүгэй да биэчэрдэри тэрийэргит. Онно артыыстар, өссө атын харахпытынан көрөрбүт, сценаҕа буолбакка, дьиҥ олоххо оонньуу сылдьар курдук буолааччыгыт.
НУ.: Оо, кэрэ да кэмнэр этилэр… (сүрэҕин туттан ылар). Ону баара, итинник шоулары оччолорго аан маҥнайгынан Саха театра саҕалаабыта дии саныыбыт. Россияҕа суох быһыылааҕа.
МБ.: Мин бу кыргыттар өссө оччолорго «сахалыы ырыаларынан композиция туруоруохха, улахан артыыстары үтүктэн шоу тэрийиэххэ» диэн этэллэрин соһуйа истэр этим. Тоҕо эрэ, ол ыра санаабыт тута туолбатаҕа. Икки сыл курдугунан Россия телевидениетын ханаалларыгар «Песни о главном» диэн шоу-биэрии баар буолбута. Ол иһин этэбин: уон биэс сыл анараа өттүгэр Саха театрын артыыстара толкуйдаабыт бырайыактара билигин Россияҕа киэҥник тарҕанна.
НУ.: Саамай сөҕөрүм диэн, ити эн өйдүүр туруорууларгар оонньуур кэммитигэр икки театр артыыстара кыттыһан, кып-кыра гримернайга үлэлээн кэлбиппит эбээт. Анегина Ильина, Нина Чигирева, Мария Николаева, Мария Силина уо.д.а. курдук улахан артыыстардыын «ыалласпыппыт». Таҥас ыйыыр да муннукпут суоҕа. Соммутун эрийэ-эрийэ муннукка, түннүк холуодатыгар анньарбыт. Репетициялыыр биир улахан сценаны манаан күнү быһа сылдьарбыт. Оччолорго испэктээкиллэр киэһэ сэттэттэн саҕаланаллара. Испэктээкил бүппүтүн кэннэ эрэ бэлэмнэнэр кыахтанарбыт. Саҥа дьыл чугаһаан, шоу оҥороору кыра да буоллар хамаанда тэринэ охсорбут. Ахсынньы 25 күнүттэн саҕалаан, күн аайы уоттаах-күөстээх киэһэлэр саҕаланаллара. Биһиги шоубутугар 800-чэ миэстэлээх театр саалатыгар киһи лыык курдук мустара. Көрөөччүлэр бары маанытык таҥнан-симэнэн, кэрэ аҥардар киэһээҥи былааччыйанан кэлэр этилэр.
МБ.: Хас биирдиибитигэр биэстии-алталыы оруол бэриллэрэ.
НУ: Шоуларбыт сыл аайы араас тиэмэлээх буолаллара.
ЕП.: Оччолорго мин театрга Ньурбаттан кэлэн саҥа үлэлээн эрэрим. Миигин бу кыргыттар саҥа кэлбит киһи аккаастыа суоҕа диэбиттэрэ буолуо, сампааннаах бытыылкалары атыылыыр кыыс оруолун миэхэ сүктэрэн кэбиспиттэрэ (Надя дьээбэлэнэн сирэйин кистиир). Оо, онно кыбыстыбыппыан! Арай сценаттан саҥа түһэн истэхпинэ, саала иһиттэн: «Лиза-аа, манна кэл!» – диэн саҥа иһилиннэ. Мин иһиттиэм-истибэтиэм диэбиттии, ол саҥа хоту дьүккүйдүм быһыылаах. Ыҥырар дьон диэки тиийбитим, Москваҕа биир кэмҥэ үөрэммит оҕолорум компаниялара олорор эбит. Мин дьолбор, тута атыыластылар. Онон, хата биирдэ эрэ итинник сампаан атыылаан турардаахпын (уҥа-таала күлэр).
НУ.: Кырдьык, наһаа ситиһиилэммиппит дии. Билиэт тиийбэккэ, аантан ыйыталлар эбит этэ. Билигин ону суохтуур көрөөччүлэр бааллар. Тоҕо диэтэххэ, биһиги баҕабыт күүһэ бэрдэ. Санаабыппыт сатаммытыттан, баҕарбыппыт туолбутуттан наһаа астынар этибит.
МБ.: Онно сүрүннээн биһиги көлүөнэ артыыстар оонньообуппут. Ону өйдүүр көрөөччүлэр: «Тоҕо урукку курдук шоулары оҥорбоккут, кыттыбат буоллугут?» – диэн ыйыталлар. Ону: «Эдэр, талааннаах көлүөнэ кэллэ, кинилэр көрүүлэрэ атын, кинилэр үлэлииллэр», – диибит.
Биирдэ Лизалыын ханнык эрэ шоуга кутуйахтар буолбуппут дии. Ол кутуйахтарбытынан шоулаан бүппүт эбиппит (күлсэллэр). Ээ, ол кэннэ эмээхситтэр буолбуппут (өссө тэбиэһирэ-тэбиэһирэ күлсэллэр).
Шоуларбытын бэйэбит тоҕо сөбүлүүр этибитий? Тоҕо диэтэххэ, сценаҕа уобараһы итийэн-кутуйа айа сылдьар курдук буолбакка, бэйэбит фантазиябытынан оонньуурбутугар көҥүл бэриллэрэ. Таҥастыын-саптыын да атыҥҥын. Көрөөччүнү үөрдэр туһугар искэр буһара сылдьыбыт толкуйгун олоххо киллэрэргэ кыах бэриллибит курдуга. Бары эдэрдэрбит да бэрт буоллаҕа-аа.
ЕП.: Күн аайы дьоҥҥо үөрүүнү-көтүүнү бэлэхтиир бырааһынньыктар этилэр.
НУ.: Фойеҕа тахсан көрөөччүлэр ортолоругар киирдэххэ, бары эйигин эҕэрдэлии көрсөллөрө. Кинилэри кытта тэҥҥэ үҥкүүлүүрбүт, үөрэрбит-көтөрбүт.
Ааптар: Ити кэнниттэн сотору Саха театрын саҥа дьиэтэ аһыллан, дьукаахтаһан бүппүккүт. Түгэнинэн туһанан эттэхпинэ, эһиги барбыккыт кэннэ Опера театра хайдах эрэ кураанахсыйан хаалбыт курдугуттан курутуйан ылбыттааҕым.
Үһүөн элбэх поэт айымньытын сценаҕа ааҕан, көрөөччүгэ тириэрдибит, саха поэзията ааҕааччыга тиийэригэр кылааккытын киллэрсибит өҥөлөөххүт.
НУ.: Сардаана Амгинская аан бастаан киэҥ эйгэҕэ тахсарыгар артыыстарга тирэммитэ диэтэхпитинэ, сыыһа буолбата буолуо. Өйдүүгүт, аан бастаан поэзия улахан киэһэтин тэрийбитин? Герасим Васильев туруоруутугар Зоя Багынанова, мин – Буор кут, Иза – Ийэ кут, Рита – Саргы кут буолбуппут. Ол кэнниттэн Василий Фомин биһигини улахан юбилейдарга хоһоон аахтарар буолбута. Нэдиэлэ аайы кэриэтэ саҥаттан-саҥа хоһоонунан айымньылары үөрэтэн, өйтөн ааҕар этибит. Василий Михайлович кытаанахтык ирдээн үөрэппит хоһоонноро күн бүгүҥҥэ диэри өйбүтүгэр хаалбыттар.
МБ.: Дьэ, ол баар эбит! Быйыл Горнайга суруйааччы Софроновтар төрөөбүт Бор алаастарыгар тиийэ сырыттыбыт. Ким эрэ эмискэ: «Хоһоонно ааҕыаҕыҥ!» диэбитигэр Надя уонна Лена Маркова дьэ аахтылар ээ. Үчүгэйкээн алааска ыскамыайкаларга олорон эрэ уоскуйан, кыргыттар айылҕалыын сипсиһэр курдук хоһооннорун өйтөн аахтылар (ким да бэлэмнээбэтэҕин үрдүнэн). Олох бэҕэһээ эрэ үөрэппит курдуктар. Ити кэмҥэ мин артыыс идэтин өссө төгүл ытыктыы уонна киэн тутта санаабытым. Араас сири-дойдуну көрөрбүтүн ааһан, артыыстарга сахалар бары ытыктыыр, таптыыр поэттарбыт дойдуларыгар тиийэн, кинилэр хоһооннорун дуорааннаахтык ааҕарбытыгар көмүс мүнүүтэлэр бэриллэллэр. Онон бириэмэттэн бириэмэтигэр ытык дьоммутугар сүгүрүйэн, кинилэри умнубаппытын биллэрэн ааһабыт.
НУ.: Василий Михайлович үөрэппит хоһоонноро өйгүттэн-санааҕыттан тахсыбаттар эбит. Ити кини «оскуолатын» биир сүдү күүстээх өрүтэ! Махтал буоллун, биһиги Василий Михайловичпытыгар!
Ааптар: Бу орто дойдуга интэриэһинэй, умнуллубат олус элбэх. Олортон биир саамай сыаналаахтара (суруналыыс быһыытынан эттэхпинэ) чугас дьоҥҥун кытта эйэргэһии, сэһэргэһии быһыылаах. Бүгүн эһигини кытары аһаҕастык кэпсэтэргэ, чугастык билсэргэ, сцена таһынааҕы олоххутун сэгэйэн көрөргө холоннубут. Ол төһө табыллыбытын, бука, ааҕааччылар, эһиги талааҥҥытыгар сүгүрүйээччилэр сыаналыахтара буолуо.
Сценаҕа көрсүөххэ диэри!
Надежда ЕГОРОВА, «Саха сирэ» хаһыат, edersaas.ru
(Н.Егорова-Намылы «Ыра санаа ыллыгынан» кинигэтиттэн)