Алта сыллааҕыта икки оҕолоох Ивановтар дьиэ кэргэттэригэр күүтүүлээх игирэчээннэр күн сирин көрбүттэрэ. Кинилэргэ биатлонист чөмпүйүөннэр Мартен Фуркад уонна Магдалена Нойнер ааттарын биэрбиттэрэ. Ол эрээри эрдэ, 28 эрэ нэдиэлэлэригэр төрөөбүт оҕолор доруобуйаларын туруга олус мөлтөҕө. Тута кырачааннар олохторун туһугар охсуһуу саҕаламмыта. Иккиэн ДЦП диэн ыарахан ыарыылаахтара биллибитэ, күн аайы оҕо доруобуйатын бөҕөргөтүү, эмтэнии, эрчийии саҕаламмыта…
Ангелина Васильева, «Cаха сирэ» хаһыат, edersaas.ru
Инбэлиит оҕолоох ыаллар олохторо ураты буолар. Дьиэ кэргэн хас биирдии чилиэнэ оҕо доруобуйатынан олорор. Доруобай оҕо кэмигэр тииһэ тахсар, хаамар, аһыыр, саҥарар буоллаҕына, инбэлиит оҕоҕо бу бэрт эрэйинэн ситиһиллэр. Өскөтүн тыа сиригэр олорор буоллахтарына, сылга хаста да анал балыыһаларга баран, эмтэнии эрэйиллэр.
Күүстээх эмтэнии, эрчийии күүһүнэн, Магдалена хойутаан да буоллар, хаампыта. Төһө да элбэхтик ыарыйдар, билигин оҕо саадыгар сылдьар.
Оттон Мартан бэйэтэ кыайан олорбот, хаампат, илиилэрэ да мөлтөхтүк хамсыыллар. Хойутаан, 4 сааһыгар саҥарар буолбута. Ол эрээри, олус өйдөөх, ураты уолчаан. Оонньуурдарын илиитигэр туттаран оонньоттоххо, харандааһы хамсатан уруһуйдаттахха, көмөлөстөххө, олус үөрэр. Дьону кытта алтыһарын, оонньуурун сөбүлүүр эрээри, оҕолор кини саҥатын тута кыайан өйдөөн истибэттэр.
Оҕо оҕо курдук, мультиктары көрөрүн, кинигэлэри аахтарарын, балтын кытта оонньуурун сөбүлүүр. Эр киһи буоларын быһыытынан, олус тулуурдаах, киэҥ көҕүстээх. Ыарахан ыарыыны, күн аайы илиини-атаҕы мускуйар сүрдээх ыарыылаах массааһы тулуйар, үтүөрүөн, хаамар буолуон, оҕолордуун тэҥҥэ сүүрүөн-көтүөн олус баҕарар. Ийэлэрэ оҕолорун тулуурдарыттан сөҕөр эрэ…
Аһыырын, ураты амтаннаах бүлүүдэлэри амсайарын сөбүлүүр, “гурман” диэн кинини ааттыахха сөп. “Я мужчина, я дегустатор”, «ммм… изысканно”, “неповторимый вкус”, “деликатес”, “какой рецепт приготовления?” эҥин дэтэлиир. Буолумуна, ийэтэ да асчыта сүрдээх.
Улааттаҕына, полицейскай буолар баҕалаах. “Бэрээдэги көрүөм, буруйу оҥорооччулары тутуталыам” диир.
Мартан-фараон кэпсээнэ
Уолчаан биир ыра санаалаах. Кини Египеккэ барыан баҕарар. “Хаһан Египеккэ барабытый?” диэн ыйыт да ыйыт буолар.
Былырыыҥҥыттан ыла кини дьонун сөхтөрөр буолбут. Египет туһунан түһээн да баттаппакка сырыттахтарына, ол дойду туһунан кинигэтэ ылыҥ диэн көрдөһөр буолбут. Дьиҥинэн, Египет туһунан киинэни, мультигы көрбөтөх, кинигэни да аахпатах эбит. Онтон дьикти кэпсээннэри кэпсиир идэлэммит.
“Урукку олохпор мин Египеккэ олорбутум, фараон этим. Биирдэ Эхнатон диэн өстөөҕүм сэриинэн саба түспүтэ. Хараабылларбын тимирдибитэ, саллааттарбын өлөрбүтэ, сорох дьоммун билиэн ылбыта. Биһиги ууга түһэн, харбаан, нэһиилэ кытылы булбуппут.
Египеккэ наһаа итии, кыһына суох, барыта кумах. Биирдэ улуу кураан буолан, холуодьастар уулара суох буолбута. Ийэм саадын сибэккилэрэ, мастара хаппыттара. Нил өрүс уола сыспыта. Дьонум ыксаабыттара, ону мин “не паниковать!” диэн бирикээстээбитим. Өрүстэн носуоһунан ууну хачайдыыры толкуйдаабыппыт.
Убайбар уонна миэхэ анаан пирамида тутар этилэр. Биирдэ өстөөхтөр саба түспүттэригэр убайым миигин сундуукка кистээбитэ, онно биэс чаастан ордук саһан сыппытым. Балтылаах этибит, кини кыһыл көмүс кыраасканан уруһуйдуура. Өстөөхтөр саба түспүттэригэр убайдаах балтым бааһырбыттара, балтым кыайан үтүөрбэтэҕэ… Бэйэм Амона диэн кыыс о5олоох этим…
“Машина времени” баара буоллар, мин ол кэмҥэ, Египеккэ төннүөм, дьоммун быыһыам этэ”, — диэн кэпсиир.
Соторутааҕыта ийэтэ бибилэтиэкэттэн «Раскрытие гробницы Тутанхамона» диэн кинигэни уларсан аҕалбыт. Онуоха хартыыҥкалары ыйа-ыйа: “бу мин таҥаһым, таапачыкам, сэриилэһэр сэбим” диир үһү. Сфинксы көрөн баран, “убайым дьиэтигэр маннык баара” диэбит. Кинигэни көрөн баран: “Хаһан Египеккэ барабытый?” диэн ыйытара элбээбит.
Сороҕор кыра оҕолор урукку олохторун өйдүүллэр диэн суруйаллар. Сыыйа онтуларын умнан кэбиһэллэр эбит. Баҕар, Мартан урут кырдьык Египеккэ олорбута буолаарай? Хантан ылан фараоннар олохторун ымпыгын-чымпыгын ойуулууруй?
Маннык ураты, олоххо тардыһыылаах уолчаан Сунтаар Элгээйитигэр олорор. Кини көмөҕө наадыйар. Урукку олоҕун умна илигинэ, хаһан эмит Египеккэ тиийиэ дуо? Үтүөрэн, оҕолордуун тэҥҥэ сырсыа дуо?
Бары да таҥара илиитин иһигэр сырыттахпыт эбээт. Ол эрээри, киһи үтүө санаатынан сырдыкка тардыһарын тухары Киһи буолар. Бары сүрэхпит сылааһын анаан, илиибитин утары ууннахпытына, кыахпыт баарынан кыратык да көмөлөстөхпүтүнэ, баҕар, Мартан ыра санаата туолаарай?
Кулун тутар 8 күнүгэр Мартаннаах Магдалена алта саастарын туолуохтара.
365 тыһ. солк. хомуллара хаалла
Олунньу 8 күнүгэр “Саха сирэ” хаһыакка “Хаарчаана тортара” диэн ыстатыйа тахсыбыта. Онно Ивановтар ийэлэрэ Хаарчаана оҕолор эмтэнэллэрин, атахтарыгар туралларын туһугар түүннэри торт астыырын туһунан суруйбуппут.
“Бу маннык ыарыылаах оҕолору тохтоло суох эрчийэ, эмтии сылдьыллыахтаах. Уолчаан хамсанара аҕыйах буолан, хаанын эргиирэ бытаарар, сүһүөхтэрэ мастыйаллар, былчыҥнара сайдыбат. Ити барыта уопсай сайдыытыгар дьайар, инникитин өссө элбэх, ыарахан сыаналаах эмтэниини эрэйэр.
Маннык оҕолорго анал тренажердар бааллар эбит. Холобур, “Мотомед” диэн тренажер сыаната 12115 евро. Ийэлэрэ тренажеры атыылыыр фирманы кытта суруйсубутугар, чэпчэтэн, 8244 евроҕа атыылыахпытын сөп диэбиттэр. Ону таһынан тиэллэн кэлиитэ туспа суума. Ол да буоллар, Ивановтарга бу дэбигис кыаллыбат суума курдук. Ийэлэрэ оҕолорун көрөн олорор, үлэлээбэт, төһө да торт астаан атыылаабытын иһин, ол аска-таҥаска, эмкэ бара турар.
Саха сирин олохтоохторо ханнык да иэдээнтэн, дьон кыһалҕатыттан туора турбат идэлээхтэр. Биирдии-иккилии да мөһөөҕүнэн уган, ким төһө кыахтааҕынан, талааннаах эдэр ийэ ыра санаата туоларын чугаһатыаҕыҥ, оҕолор барахсаттарга толору, дьоллоох оҕо сааһы бэлэхтиэҕиҥ диэн ыҥырабыт!”.
Олунньу 28 күнүнээҕи туругунан, Мартан счетугар 162 238 солкуобайы үтүө санаалаах дьон ыыппыттар. Аны 365 378 солк. хомуллара хаалбыт.
Реквизиттэрэ: “Сбербаан” каартата 4276 7600 1170 1404. Мобильнай баан: 89142931777.
Ангелина Васильева, «Cаха сирэ» хаһыат, https://edersaas.ru