Тохсунньу 20 күнүгэр Манчаары Баһылай аатынан спорт национальнай көрүҥнэрин киинигэр мас тардыһыытыгар “Офсет” тэрилтэ Кубогар хамаанданан турнир буолар. Бу спорт кулууптарын икки ардыларыгар аан бастакытын ыытыллар күрэхтэһиигэ Дьокуускай, Нам, Амма, Томпо мадьынылара күөн көрсүөхтэрэ.
Кыайыылаах хамаандаҕа “Офсет” тэрилтэ генеральнай дириэктэрэ, мас тардыһыыга өрөспүүбүлүкэтээҕи федерация вице-бэрэсидьиэнэ Алексей Скобелев 100 тыһыынча солкуобайы туттарыаҕа.
Сүрүн бириис иһин «Амикан» спорт кулууба (салайааччы Анатолий Баишев), «Батас» СК (Алексей Агапов), «Боотур» СК (Иван Белолюбскай), «Модун» СК (Николай Константинов), «ХИФУ» СК (Егор Кудрин), «Тайм» СК (Петр Давыдов), «Томпо» СК (Афанасий Саввин), «Эҥсиэли» СК (Николай Дьяконов) киирсиэхтэрэ. Күөн көрсүһүүлэр биэс ыйааһынынан — 60 кг, 70 кг, 80 кг, 90 кг уонна 90 кг үөһэ — ыытыллыахтара.
Бастакы тэрээһиҥҥэ эр дьон эрэ кыттыахтара. Тэрийээччилэр этэллэринэн, саҥаны киллэрии быһыытынан, күрэхтэһиигэ Арассыыйа НА СС Хотугу сир кыһалҕаларын үөрэтэр физико-техническай институтун учуонайдара айан оҥорбут старт-массыыналара туһаныллыаҕа.
Сүрүн судьуйанан норуоттар икки ардыларнааҕы категориялаах судьуйа Дмитрий Шарин үлэлиэҕэ. Киирии төлөбүрдээх.
Күрэхтэһии бырагыраамата
10:00 – 11:30 – ыйааһыннаныы
11:30 – 13:40 – күрэхтэһиини үөрүүлээхтик арыйыы
14:00 – 17:00 – барыллаан күөн көрсүһүүлэр
17:00 – 18:00 – түмүк күөн көрсүһүүлэр
18:00 – кыайыылаахтары наҕараадалааһын, күрэхтэһиини үөрүүлээхтик сабыы.
Роман ПОПОВ, “Саха сирэ” хаһыат, edersaas.ru