РФ миниистирэ мас тардыһыытын былаһааккатын хайҕаата

Ааптар: 
Бөлөххө киир:

Аан дойдутааҕы ыччат бэстибээлигэр мас тардыһыытын былаһаакката күнтэн  күн дьон биһирэбилин ылан иһэр. Саха төрүт көрүҥүн чулуулара тас дойдуттан кэлбит ыалдьыттарга билиһиннэрэр үлэни дьаныардаахтык ыыта сылдьаллар. Аҥардас былаһааккатын оҥоһуута киһи хараҕын үөрдэр. 

edersaas.ru

Тэрээһин үлэтин норуоттар икки ардыларынааҕы мас тардыһыытын исписэлиистэрэ Лена Томская, Арнольд Мохов, Михаил Пахомов, Айсен Семенов, Диана Федотова уонна да атыттар ыыта сылдьаллар. Бэстибээл саҕаланыаҕыттан ыла саха мас тардыһааччыларын  хамаандата биэс бөлөххө хайдыһан дьуһуурустубалыыллар. Кинилэр араас омуктарга маастар-кылаас көрдөрөллөр, киирсэр ньымалары билиһиннэрэллэр уонна хаартыскаҕа түһүүнү тэрийэллэр. Мадьыныларбыт тас дойду араас тыллаах омуктарын кытта биир тылы булаллара сөхтөрөр.  Маны таһынан мас тардыһыытын билиһиннэриигэ сахалар эрэ буолбакка, Уругвай, Бразилия, Новай Зеландия, Польша, Армения, Азербайджан уонна Монголия спортсменнара көмөлөһөллөр.

Бастакы күҥҥэ, мас тардыһыытын былаһааккатыгар арассыыйа спордун миниистирэ Павел Колобков ыалдьыттаата.  Кини мас тардыһыыта бэстибээлгэ аккредитация ааһарыгар улахан өҥөтүн уурбута. Мас тардыһыытын былаһааккатын оҥоһуутун, тэрээһинин хайҕаата.

Николай Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0