Орто Халыма улууһугар кыһыҥҥы суол аһылла илигин туһунан «Саха сирэ» хаһыакка уонна edersaas.ru сайтка суруйан турабыт. Нэһилиэктэргэ оттук саппааһа бүтэн эрэр. 10 туонна таас чоҕу тиэммит «КаМаЗ» уонна «Урал» массыыналар Сыбаатайга айаннаабыттара эрээри, күн бүгүнүгэр диэри миэстэтигэр тиийэ иликтэр. edersaas.ru
Сыбаатай нэһилиэгэ улуус кииниттэн сүүстэн тахса килэмиэтирдээх сиргэ баар. Быйыл күөллэр тааҥнаан уонна хаар аһара элбэхтик түһэн, кыһыҥҥы суолу оҥорууга харгыстар үөскээтилэр. II-с Мээтис баһылыга Иннокентий Колосов иһитиннэрбитинэн, буурҕа түһэн массыыналар аара суолга хаайтарбыттар. Массыыналары Ка-700 тыраахтар арыалаан испит. Билигин нэһилиэктэн бульдозеры ыытаннар, «КаМаЗ» массыынаны аҕалыахтаах.
Бу иннинэ оттугу ахсынньы 21 күнүгэр аҕалбыттар. Билигин хочуолунай үлэлии турар. Ол эрээри хамыыһыйа быһаарыытынан, оскуола тамныйбытынан сибээстээн, билигин оҕолору дьиэлэригэр үөрэтэ сылдьаллар.
Кыһыҥҥы суол 30 туоннаҕа диэри көҥүллэннэҕинэ биирдэ улахан массыыналар тиэйии-таһыы үлэтин ыытыахтаахтар. Хомойуох иһин, күн-дьыл туруга мэһэйдээн, оттугу тиэйиигэ бытаарыы таҕыста.
Анивера АКИМОВА, «Саха сирэ» хаһыат, edersaas.ru