Сайын кэлэн, өрүстэргэ, күөллэргэ сөтүөлээччилэр элбээн эрэллэр. Ону тэҥэ, кытылга массыыналарын сууйар дьон эмиэ элбииллэр. Бу күннэргэ Саха сиринээҕи айылҕа харыстабылын кэмитиэтэ көҥүлэ суох сиргэ массыыналарын сууйааччылары тутар рейдэлэрин сөргүттэ.
Массыынаны көҥүллэммит, анал сиргэ сууйуллуохтаах, өрүс, күөл кытылыгар сууйар бобуллар. Тоҕо диэтэххэ, экологияны киртитэр бэнсиин, уматык тобохторо, химиичэскэй сууйар убаҕастар, араас кир-хох ууга түһэр. Ону тэҥэ, элбэх кыбартыыралаах дьиэлэр олбуордарыгар сууйар эмиэ көҥүллэммэт.
Айылҕа харыстабылын кэмитиэтин үлэһиттэрэ күн аайы өрүс, күөллэр кытылларын кэрийэллэр да, сууйааччы ахсаана аҕыйаабат. Ордук ардах түспүтүн кэннэ, куйаас күҥҥэ элбииллэр.
Кистэл суох, Дьокуускайга массыына ахсаана элбии турар. Ол иһин кэнники кэмҥэ уулуссаларга харгыстар үөскүүллэр, массыынаны туруорар уонна анал сууйар сирдэр тиийбэттэр. Оттон массыыналаах дьон сууйарга эбии харчы төлүөхтэрин баҕарбаттар. Ол эрээри, айылҕаны, тулалыыр эйгэни киртитэллэрин эмиэ өйдүөх тустаахтар.
Ыстараап суумата төһөнүй?
Күөл, үрэх, өрүс кытылыгар массыыналарын сууйа турар дьоҥҥо – 500-1000 солкуобай, дуоһунастаах дьоҥҥо – 1-2 тыһыынча солкуобай, юридическэй сирэйдэргэ – 10-20 тыһыынча солкуобай. Бу ыстараап РФ Административнай быраабы кэһии кодексын (КОАП) 8.13 ыстатыйатынан көрүллэр.
Ангелина Васильева, “Саха сирэ” хаһыат, edersaas.ru