close
podpiska

Математик үөрэх министиэристибэтин салайыаҕа
Бэлиитикэ

Математик үөрэх министиэристибэтин салайыаҕа

Егоров Владимир Анатольевич Ил Дархан ыйааҕынан үөрэҕирии уонна наука миниистиринэн ананна.


Владимир Анатольевич 1966 с. Сунтаарга төрөөбүтэ.

1988 сыллаахха М.Ломоносов аатынан Московскай судаарыстыбаннай университет механико-математическай факультетын бүтэрбитэ. 1991 сыллаахха физико-математическай наука кандидата буолбута.

1991 – 1995 сс. – атомнай станцияларга үлэһиттэри бэлэмниир Смоленскайдааҕы учебно-тренировочнай кииҥҥэ I категориялаах математик.

1996-2013 сс. – СГУ (ХИФУ) математическай анализ кафедратын доцена.

2013 с. — «Ленскэй кыраай» физико-математический форум генеральнай дириэктэрэ.

2015 с. — «СӨ наукаларын аччыгый академията» («Малая академия наук РС(Я)) ГАТ ректора.

В.А. Егоров научно-педагогическай уопуттаах, талааннаах ыччаты иитэргэ-үөрэтэргэ элбэх сыратын уурар.

Наука уонна техника эйгэтигэр СӨ Судаарыстыбаннай бириэмийэтин лауреата, СӨ үөрэҕириитин үтүөлээх үлэһитэ, эбии үөрэхтээһин үрдүкү категориялаах педагога, СӨ саахымат федерациятын президиумун чилиэнэ. Кэргэннээх.Үс оҕолоох.

845abeeda23a8b92025aed6502896f61Афанасий Ноев, “Сахамедиа” генеральнай дириэктэрин бастакы солбуйааччы, педагогическай наука кандидата, 2003-2008 сс. «Ленскэй кыраай» физико-математический форум дириэктэрэ:

«Егоров Владимир Анатольевич үөрэҕирии уонна наука миниистиринэн анаммытын сэргии иһиттим.

Владимир Анатольевич, бастатан туран дириҥ математическай билиини, үөрэҕи биэрэр МГУ-ы бүтэрбитэ. Смоленскайга научнай киинҥэ үлэлии сылдьыбыта. Ол аата российскай науканы кытта ситимнээх. Иккиһинэн, ылбыт билиитин, наукаҕа ситиһиитин толору туһанан, ХИФУ-ка доценныыр кэмигэр, төрөөбүт дойдутун ыччата үүнэригэр-сайдарыгар быһаччы бэйэтин кылаатын киллэрсибитэ. Үсүһүнэн, дьоҕурдаах оҕолору кытта дьаныһан туран дьарыктанан, биир кэлимсэ ситим олохтоноругар таһаарыылаахтык үлэлээбитэ эмиэ үтүө түмүктэрдээх. Кини саҥа соруктардаах министиэристибэ үлэтин сөптөөхтүк сүрүннүөҕэ диэн эрэнэбин.»

Чокуур Гаврильев.

#бүгүн: 1
0
0

Сайт матырыйаалларын ааптар көҥүлэ суох ылар бобуллар.