Мэҥэлэр эр дьон оһуохайын тарҕатар баҕалаахтар

Ааптар: 
Бөлөххө киир:

Аҕыйах хонуктааҕыта Майаҕа «Кыталык» оҕо-ыччат эстетическэй киинигэр аҕалар улуустааҕы пуорумнара ыытылынна. Уопсастыба, дьиэ кэргэн эрэллээх тулааһыннара буолар дьон иккис өрөспүүбүлүкэтээҕи сийиэстэрин көрсө ыытыллыбыт тэрээһиҥҥэ нэһилиэктэртэн аҕалар түмсүүлэрин бэрэссэдээтэллэрэ, чилиэннэрэ, өрөспүүбүлүкэтээҕи сийиэскэ кыттыахтаах эр дьон түмүстүлэр. Пуоруму улуус аҕаларын сэбиэтин бэрэссэдээтэлэ Егор Белолюбскай иилээн-саҕалаан ыытта.

Тэрээһин үлэтигэр кыттыыны ылбыт “СӨ аҕаларын лигата” түмсүү бэрэссэдээтэлэ Айхал Габышев киһини толкуйдатар сыыппаралары эттэ.

Ол курдук, өрөспүүбүлүкэбитигэр 256 тыһыынча дьиэ кэргэн баарыттан, 110 тыһыынчата оҕото суох, былырыын 6 200 саҥа ыал холбоһон иэримэ дьиэ аал уотун оттубут буоллаҕына, 4 100 ыал арахсыбыт, 67 тыһыынча аҥардас ийэ, 82 тыһыынча аҥардас аҕа баар, 16 808 учууталтан эр киһитэ 2 400-һэ.

“Аҕалар түмсүүлэрэ дьиэ кэргэн бигэ туруктаах буоларын туһугар, чөл олоҕу көҕүлээһиҥҥэ, оҕону сиэр-майгы, өй-санаа өттүнэн иитиигэ күүскэ үлэлэһэр”, — диэн туран, Айхал Габышев Уус Алдаҥҥа аҕалар хас биирдии дьиэҕэ спортивнай муннук баар буоларын ситиһэргэ, Амма Бөтүҥүгэр эдэр аҕалар бэйэлэрин күүстэринэн 50 миэстэлээх оҕо уһуйаанын, Чурапчы Чыаппаралара Айыы балаҕанын тутарга сыалланан-соруктанан үлэлииллэрин холобурдаата.

“Муус устар ый бастакы өрөбүлүн Аҕалар күннэринэн, иккис баскыһыанньатын Уол оҕо күнүнэн итиэннэ муус устар ый бастакы субуотатын Булчут күнүнэн биллэрэн, эр киһи, аҕа оруолун дьиэ кэргэҥҥэ күүһүрдүүгэ туһуламмыт дириҥ суолталаах бэлиэ күннэри олоххо киллэрдибит”, — диэтэ.

Улуус баһылыга Николай Старостин эр киһини үрдүктүк тутууга киэн туттар дьоммут — Манчаары Баһылай, Федор Попов, Тимир Пинегин уо.д.а. холобурдарынан ыччаттарбытын иитиэҕиҥ диэн ыҥырда.

Пуорумҥа СӨ Ил Түмэн дьиэ кэргэн, ыччат, оҕо саас уонна спорт дьыалаларыгар сис кэмитиэтин Бочуотунай грамотатынан Чыамайыкы нэһилиэгин аҕаларын сэбиэтин бэрэссэдээтэлэ Егор Прокопьев, Мооруктан Роман Егоров, Мэҥэ нэһилиэгиттэн Андрей Винокуров, улуус дьаһалтатын баһылыгын Грамотатынан Томтор нэһилиэгиттэн элбэх оҕолоох аҕа Павел Желобцов, Майа сэлиэнньэтин, Төҥүлү нэһилиэгин аҕаларын түмсүүтүн бэрэссэдээтэллэрэ Анатолий Егоров, Василий Макаров, Мэлдьэхситээҕи баһаарынай сулууспа начаалынньыга Семен Герасимов, Махтал суругунан Бэдьимэ нэһилиэгин аҕаларын түмсүүтүн салайааччы Николай Атласов, Ороссолуода нэһилиэгин сэбиэтин бэрэссэдээтэлин солбуйааччы Сергей Филиппов наҕараадаланнылар.

«СӨ Аҕаларын лигата» түмсүү түөскэ анньыллар анал бэлиэтэ Төҥүлү нэһилиэгин бочуоттаах бэтэрээнигэр, дьиэ кэргэн лааҕырын тэрийээччи Влас Михайловка уонна Хорообуттааҕы ОДьКХ учаастагын начаалынньыга Гаврил Аргуновка туттарылынна.

Көрсүһүүгэ норуот педагогикатын ассоциациятын бырабылыанньатын бэрэссэдээтэлэ Иван Кондаков бэйэтин көрүүлэрин үллэһиннэ. Кини аныгы сайдыылаах олоххо оҕо интэриэһин батыһан, кинини кытта тэҥҥэ сайдыахха диэн эттэ.

Саха үгэскэ кубулуйбут көрүҥнэригэр улуустааҕы бэдэрээссийэ бэрэссэдээтэлэ Дмитрий Тихонов аҕа оҕотун улахан саҥата-иҥэтэ суох, батыһыннара сылдьан үлэҕэ-хамнаска уһуйуохтаах диэнинэн салайтаран үлэлиибит уонна саха оҕото норуот үтүө үгэстэрин, сахалыы тыынын илдьэ сылдьан улаатыахтаах диэн өйдөбүлү тутуһабыт диэтэ. Бэдэрээссийэ иһинэн сулумах сылдьар дьону холбуур, ыал оҥортуур соруктар эмиэ туралларын эттэ.

«Төлкө» уопсастыбаннай түмсүү бэрэссэдээтэлэ Иван Румянцев оскуола бастыҥнары эрэ өрө тутар буоллаҕына, биһиги түмсүүбүт мөлтөхтүк үөрэнэр оҕолору кытта үлэлэһэр уонна лиидэр оҕолору кытта сылдьан тэҥҥэ сайдар усулуобуйаларын тэрийэбит, үөскэтэбит диэтэ.

Байыаннай дьайыылар бэтэрээннэрин түмсүүтүн бэрэссэдээтэлэ Николай Семенов оҕолору патриот тыыныгар иитиигэ болҕомтону ууруохха диэн ыҥырда. Кини оҕолору кытта Белоруссияҕа Ф.К.Попов көмүллэ сытар сиригэр олус үчүгэйдик сылдьан кэлбиттэрин кэпсээтэ.

«Кыталык» ансаамбыл уус-уран салайааччыта Василий Винокуров «Сүр көтөҕүү» диэн эр дьону, уолаттары сомоҕолуур бырайыагын кытта билиһиннэрдэ уонна эр дьон оһуохайын тарҕатыаҕыҥ диэн баҕа санаатын тиэртэ.

Чыамайыкы аҕаларын түмсүүтүн бэрэссэдээтэлэ Егор Прокопьев быйыл нэһилиэккэ Аҕа сыла биллэриллибитин, кыра оҕолору муҥха, куйуур о.д.а. эр киһи үлэтигэр тэҥҥэ илдьэ сылдьалларын, спорт саалатын чөлүгэр түһэрэн үлэҕэ киллэрбиппит диэн кэпсээтэ.

Тумул оскуолатын эдэр учуутала Юрий Слепцов «Уол оҕону өбүгэ үгэһигэр иитиигэ оскуолаҕа үлэ» диэн бырайыагын билиһиннэрдэ. Кини оҕолор норуот төрүт үгэстэрин олус сөбүлүүллэрин уонна олоххо көхтөөх, түмсүүлээх буолаллар эбит диэн түмүккэ кэлбитин эттэ.

Дойду нэһилиэгин ыччата Александр Кулешев «Дойду сайдыыта ‒ ыччат илиитигэр» диэн бырайыагынан тыа хаһаайыстыбатын салаатын сайыннарыыга араас улуус ыччатын түмэр баҕа санаалааҕын, билиҥҥитэ Орто Халыматтан, Хаҥаластан эдэр дьон көһөн кэлиэхтэрин баҕаралларын туһунан биллэрбиттэрин кэпсээтэ.

Ыччаты чөл олоххо, спорка сыһыарыыга, эр дьону иитиигэ дьоҕус тэрээһиннэри ыытыы, усулуобуйаны олохтооһун туһунан Ороссолуодаттан Сергей Филиппов, Төхтүртэн Иван Ермолаев, Дмитрий Жирков, Бэдьимэттэн Петр Андросов, Хочоттон Вячеслав Соколов о.д.а. санааларын үллэһиннилэр.

Өрөспүүбүлүкэтээҕи Аҕалар иккис сийиэстэригэр биһиги улууспутуттан 32 дэлэгээт кыттыаҕа.

Виктория БЕЛОЛЮБСКАЯ.

+1
0
+1
0
+1
0
+1
0
+1
0
+1
0
+1
0