Мэҥэ Хаҥалас улууһун Нөөрүктээйи нэһилиэгэр Павловскайга “Хаҥалас-Тутуу” ХЭУо 120 ыанньык ынах турар хотонун тутарга ылсан эрэрин эрдэ иһитиннэрбиппит. Ил Дархан э.т. Айсен Николаев соторутааҕыта улууска тахса сырыттаҕына, олохтоохтор бу боппуруоһу күүскэ туруорсубуттара.
edersaas.ru
Бэҕэһээ, атырдьах ыйын 1 күнүгэр, комплекс каркааһын бастакы ыстаал тутулуктарын туруордулар. “Хаҥалас-Тутуу” тэрилтэ салайааччыта Кан Терешкин: “Балаҕан ыйын 27-гэр, Саха Өрөспүүбүлүкэтин күнүн көрсө эбийиэги үлэҕэ киллэрэбит”, — диэн тылын биэрэн, Михаил Егоров аатынан ХЭУо дириэктэрэ Петр Шамаевтыын илии тутустулар.
“М.Егоров” ХЭУо — Мэҥэ Хаҥалас улууһа биэс бөдөҥ хаһаайыстыбалааҕыттан биирдэстэрэ. Быйыл 331 ынах сүөһүлээх, 63 сылгылаах хаһаайыстыба 2 эргэ хотонуттан биирэ, сүүрбэччэ сыллааҕыта тутуллубут холлоҕос хотоно, сууллан, кэлэр кыстыкка хайдах буолара биллибэт кыбыстыылаах балаһыанньаҕа киирбитэ. Тыа хаһаайыстыбатын министиэристибэтин 2018 сыллааҕы былааныгар киллэриллэн, бэдэрээтчити була охсон, комплекс туруохтаах сиригэр буор куттарбыттара, тимир конструкцияны тиэйтэрбиттэрэ баара…
Үөһэ бүддьүөтү хос көрүүгэ үптэрэ сарбыллан, күөстэрин эрдэ өрүммүт курдук буолан тахсыбыттара. “Эрэйдээх – этигэс, муҥнаах – булугас” дииллэринии, өрөспүүбүлүкэ баһылыга кыһалҕаларын өйдөөн өйөөбүтүттэн “Дьөгүөрэптэр” үөрүүлэрэ үрдэ суох. “Туймаада” ҮХАПХ АУо-тан кыра бырыһыаҥҥа харчы иэс ылбыттара тутуу хамныырыгар төрүт буолла. Толуйуу үбүн сорҕото федеральнайтан бу сыл иһинэн кэлиэхтээх, оттон өрөспүүбүлүкэ ирээтин эһиилги бүддьүөттэн биэрэргэ эрэннэрэллэр.
Василий НИКИФОРОВ, edersaas.ru