1982 с. муус устар 6 күнэ. Бу күн өрөспүүбүлүкэ 17 оройуонуттан түмүллэн бастакы ударнай комсомольскай этэрээт 36 байыаһа Мээндиги кырыс сиригэр олохсуйа кэлбиттэригэр анаммыт үөрүүлээх мунньах Мээндиги кулуубугар буолбута. Миитини Соморсун нэһилиэгин олохтоох сэбиэтин бэрэссэдээтэлэ Григорьев Ж.Н. аспыта. Эҕэрдэ тыллары хомсомуол обкуомун сэкирэтээрэ А.Рудых, Амматааҕы райкомун бастакы сэкирэтээрэ В.Курчатов, холкуоһунай тутуу бэтэрээнэ С.С.Капитонов уо.д.а. эппиттэрэ.
Муус устар 17 күнүгэр Мээндигигэ 63 үлэһиттээх ыччат-комсомольскай отделение тэриллибитэ. Бастакы управляющайынан учуутал үөрэхтээх, Сулҕаччыга ыстаарсай биригэдьииринэн үлэлээбит Иванов П.К. анаммыта. 1984 с. РСФСР Тыатын хаһаайыстыбатын министиэристибэтин бирикээһинэн элбэх сыллаах от ыһыытынан дьарыктанар уонна от сиэмэтинэн өрөспүүбүлүкэ сопхуостарын хааччыйар аналлаах “Мээндиги” сопхуос тэриллибитэ. Бастакы дириэктэринэн агроном үөрэхтээх Аграфена Николаевна Парфенова анаммыта.
1986 с. атырдьах ыйын 20 күнүгэр РСФСР Миниистирдэрин Сэбиэтин уурааҕынан “Мээндиги” сопхуос опытнай-производственнай хаһаайыстыбаҕа уларыйан, Илин Сибиирдээҕи ВАСХНИЛ бас билиитигэр бэриллибитэ. ОПХ-ҕа 6310 гектар иэннээх сир сыһыарыллыбыта, итинтэн 1205 гектара — бааһына сирэ.
“Мээндиги” ОПХ экономическай көрдөрүүлэринэн 2007 с. диэри ыарахаттар баалларын үрдүнэн үлэлээн кэлбитэ. 2006 с. 354 т от, 824 т бурдук, 4 цн бурдук сиэмэтэ, 4 т хаппыыста хомуллубута.
Онтон сыыйа сыллата производство таҥнары баран, билигин институт аҕыйах сылгытын көрөр үлэһиттэр уурайан, хаһаайыстыба эһиннэ.
Онон мин ССТХНЧИ салалтата Тыа хаһаайыстыбатын министиэристибэтин кытта сүбэлэһэн, саҥа хаһаайыстыба тэрийэн, үлэни быһааралларыгар туруорсабын.
Алексей ФИЛИППОВ,
үлэ бэтэрээнэ, 1988-1991 сс. “Мээндиги” ОПХ дириэктэрэ.
Хаартыска: интэриниэттэн