close

Мексикаҕа саха ыһыаҕа
Олох-дьаһах - ЭС - маны аах

Мексикаҕа саха ыһыаҕа

Бу күннэргэ Мексикаҕа  Ваядолид куорат Чичимила сиригэр Аар Баҕах сэргэ турда, күөх от тэлгэннэ, саха түһүлгэтэ төрүттэннэ. Бу дойдуга  Сунтаар дьоно «Эллэйаада» түмсүүнү кытта ыһыах сиэрин-туомун көрдөрдүбүт. Бырайыак ааптардара Михаил Ершов уонна биһиги биир дойдулаахпыт Вильям Яковлев сири-дойдуну кэрийэн, аан дойду таһымыгар саха норуотун билиһиннэрэр, ытык бэлиэ сэргэни туруоран, суолталаан биэрэр үтүө түгэни номнуо төрдүс төгүлүн тэрийэллэр.

edersaas.ru

Ол курдук, Францияҕа, Турцияҕа, Америка Калифорниятыгар  турбут сэргэлэр тэҥэ, аны Мексикаҕа Сунтаар ытыктыыр Аар Баҕах сэргэтэ  туруорулунна. Сэргэ ааптардара: Вильям Яковлев, Лука Егоров, Юрий Ксенофонтов.  Ыһыах сиэрин-туомун көрдөрөр күммүтүгэр Саха сирин ытык күнүн санатар чаҕылхай күн туран, түһүлгэ аттыгар ынахтар мэччийэ сылдьаллара, биһиги ыһыахпытын санатта. Үөрүүлээх түһүлгэбитигэр ыраахтан-чугастан араас омук дьоно түмсэн тула өттүгэр турунан, Кураһаай Мэхээлэ алгыһын иһиттилэр, ыччаттарбыт  үҥкүүлэрин  көрдүлэр, кылыһахтаах тойугу иһиттилэр, кымыһынан, алаадьынан күндүлэннилэр.

Ыһыах саҕаланыыта түһүлгэҕэ бары ыраастанан киирбиттэрэ, Дьөһөгөй маанылаах симэҕинэн киэргэммит аттарга сахалыы таҥастаах уоллаах кыыспыт түһүлгэҕэ киириилэрэ ураты кэрэ көстүү этэ. Сунтаар оһуокайын кэннэ Гаврил Еремеев олохтоох дьоҥҥо өбүгэ оонньуутун — мас тардыһыытын, ыстаныыны оонньотто. Манна кэлбит дьон Ваядолид, Чичимила сирин баһылыктара, олохтоохтор, чинчийээччилэр кэлэн түһүлгэбит ытык-мааны ыалдьыттара буолбуттарыгар улахан махталлаахпыт.

Ыраах дойдуга бииргэ сылдьыбыт дьоммор Эдит Сотоҕа, Михаил Ершовка, кыыһыгар Лизаҕа, Вильям Яковлевка, Лука Егоровка, Юрий Ксенофонтовка, Людмила Слепцоваҕа, Семен Ермолаев — Сиэн Өкөргө, Кураһаай Мэхээлэҕэ, Гаврил Еремеевкэ, Василий Васильевка, Антонина Кириллинаҕа, Августина Платоноваҕа, Ольга Захароваҕа, Вячеслав Борисовка, оҕолорго махтанабын уонна бу айымньылаах айан Эһиги олоххутугар умнуллубат өйдөбүл буолан, куруутун саха норуотун ааттыыр үтүө түгэн буолан хааллын диэн баҕа санаабын этэбин.


Сахам дьоно бу алгыстаах Мексикаҕа сырыыны, тэрээһини көр-нар эрэ курдук санаабакка, сөпкө өйдүүргүтүгэр көрдөһөбүн, сөптөөх үлэ барбыт диэн бигэргэтэн алгыстаах сырыынан сыаналааҥ! Сэргэ туруута — саха сылдьыбыт, алгыс түспүт сирэ диэн өйдөбүллээх! Оннук ытык сирдэр элбээтиннэр уонна суолталанныннар! Бу биһиги олоххо кэлбит ытык иэспит, саха буоларбыт бэлиэтэ!

Мария Кобельянова-Тускулаана, Сунтаар

#бүгүн: 6
3
0

Сайт матырыйаалларын ааптар көҥүлэ суох ылар бобуллар.

Мин санаам:

14 + 5 =