Мэтээли биэриигэ биир кэлим эксээмэн (ЕГЭ) түмүгүн учуоттуохха диэн эппиттэр
Үөрэҕи уонна науканы кэтээн көрөр федеральнай сулууспа саайтыгар сурулларынан, соторутааҕыта Уопсастыбаннай сэбиэт мунньаҕа буолан ааспыт. Мунньахха чопчу оскуоланы бүтэрээччилэргэ бэриллэр мэтээл туһунан кэпсэппиттэр.
edersaas.ru
Билиҥҥитэ мэтээли ыларга биир кэлим эксээмэн бааллара дьайбаттар. Оҕо 10-с, 11-с кылаастарга туйгун сыанаҕа үөрэммит буолуохтааҕа эрэ ирдэнэр. Мунньахха, Уопсастыбаннай сэбиэт оҕо мэтээли ыларыгар биир кэлим эксээмэнин түмүгэ учуоттаныан наадатын эппит.
Уопсастыбаннай сэбиэт чилиэнэ, Арассыыйатааҕы “Сыл бастыҥ учуутала-2013” куонкурус муҥутуур кыайыылааҕа Андрей Сиденко, талбыт эксээмэннэрин барытын ситиһиилээхтик туттарбыт уонна ыйыллыбыт кэрдиискэ олоҕуран биэрэргэ этии көтөхпүт. Манна кини Москва уопутун кэпсээбит. Ол курдук, Москваҕа атын ирдэбиллэри сэргэ, биир кэлим эксээмэҥҥэ үс биридимиэт түмүгүнэн 220-тэн итэҕэһэ суох баалы ылыахтаахтарын холобурдаабыт.
Үөрэҕи уонна науканы кэтээн көрөр федеральнай сулууспа салайааччыта Сергей Кравцов, мэтээли биэрии усулуобуйата оҕолорго да, төрөппүттэргэ даҕаны дьэҥкэтик өйдөнөр буолуохтааҕын ыйбыт.
Билиҥҥитэ “кыһыл көмүс” уонна “үрүҥ көмүс” мэтээллэр үөрэххэ туттарсыыга эбии бааллары биэрэллэр. Ол курдук, холобура, Хотугулуу-Илиҥҥи федеральнай университекка туттарсааччылар оскуоланы “кыһыл көмүһүнэн” бүтэрбит буоллахтарына 7 баал, “үрүҥ көмүһүнэн” бүтэрбиттэргэ 5 баал эбиллэр.
Людмила ПОПОВА, “Саха сирэ” хаһыат, edersaas.ru