“Миигин албыннаатылар дуу, хайдах дуу?”

Бөлөххө киир:

СӨ Роспотребнадзор управлениетын Таатта оройуонугар территориятааҕы отдела (сал. Е.А.Тарасова) туһанааччылар бырааптарын көмүскээһиҥҥэ тиһиктээхтик үлэлиир. Биһиги ааҕааччыларбыт бу тэрилтэ кылаабынай исписэлиис-эксперэ Екатерина Ефремова  биэрэр сүбэлэрин олоххутугар-дьаһаххытыгар туһаныахтарын сөп. edersaas.ru

Дуогабар бөдөҥ гына суруллуохтаах

Туһааннаах отделга биир инбэлиит киһи үҥсүү түһэрбит. “Миигин албыннаатылар дуу, хайдах дуу? Манна баттаа, итиннэ баттаа диэн ыйан биэрбиттэригэр  илии эрэ баттаан истим”, — диэбит. Онуоха исписэлиистэр инбэлиит аҕалбыт кирэдьиитинэй дуогабарын аахпыттар. Уонна “Восточнай экспресс баан” бу киһиэхэ биэрбит кирэдьиитин докумуонун шрибэ олус бытархайын, киһи аахпат гына суруллубутун быһаарбыттар. Дьиҥэ,  2014 с. Потребительскай кирэдьиит туһунан сокуон тахсыбыт эбит. Онно баан биэрэр дуогабарын уҥа өттүнээҕи муннугар кирэдьиит төһө бырыһыаҥҥа бэриллибитэ киһи ааҕар гына улаханнык суруллуохтаах. Оттон “Восточнай экспресс баан” инбэлииккэ биэрбит кумааҕытыгар тиэкис олус бытархай гына (0,8) суруллубут. Быраабыланы тутуспатах баан ыстарааптаммыт.

Төлөпүөн төннөн кэлбэтэҕинэ

Суотабай төлөпүөн күндү малга кубулуйбута ыраатта. Тыа сиригэр төлөпүөнтэн сылтаан элбэх киһи Роспотребнадзор отделын аанын арыйар. “Кыһалҕалаах киһи төһөнөн эрдэ кэлэр даҕаны, соччонон дьыалата түргэнник быһаарыллар”, — диир Екатерина Ивановна. Хомойуох иһин, сорохтор бэйэлэрэ сүүрэ сатаан баран, кыайбакка, бэл, сыл буолан баран кэлэр түгэннэрэ баар. Смартфон, андроид төлөпүөннэр үлэлиэхтээх болдьохторун иһинэн алдьаннахтарына, эмиэ манна үҥсүү түһэрэргэ тиэтэйиэхтээхтэр. Гарантийнай өрөмүөн ыытыллыыта сокуонунан көрүллэр болдьоҕо 45 хонук. Бу болдьоххо төлөпүөн өрөмүөҥҥэ барар уонна төттөрү кэлэр күннэрэ барыта ааҕыллар. Дьэ, оччоҕуна анарааттан туһанааччыга иһитиннэрии кэлиэхтээх. Кэлиэхтээх болдьоҕо тутуһуллубатаҕына, тустаах киһи ол туһунан суругунан биллэриэхтээх. РФ “Туһанааччылар бырааптарын көмүскээһин туһунан” сокуону кэспит буоллахтарына, административнай эппиэккэ тардыллан, ыстараап миэрэтэ туттуллар. Алдьаммыт төлөпүөнтэн сылтаан тахсыбыт хоромньуну суут быһар.  Бу Роспотребнадзор Тааттатааҕы отделын нөҥүө сылга төлөпүөҥҥэ сыһыаннаах ортотунан 2-3 дьыала туһанааччы туһатыгар быһаарыллар. Дьиҥэ, киһи бэйэтэ ирдэһэринээҕэр, роспотребнадзордар көмөлөрүнэн туһаннаҕына, адвокат эҥин булан, ороскуокка тэбиллибэт. Дьыала барыта босхо оҥоһуллар.

Женни СТРЮКОВА.

+1
0
+1
0
+1
0
+1
0
+1
0
+1
0
+1
0