«Мигалкинскай ааҕыыларга» түмүстүлэр

Бөлөххө киир:

Муус устар 7 күнүгэр Уус Алдан улууһугар В.Н. Мигалкин аатынан орто оскуолаҕа «Мигалкинскай ааҕыылар» научнай-практическай кэмпириэнсийэ тэрээһиннээхтик буолан ааста.


Норуодунай бэйиэт Иван Мигалкин салалтатынан Дьокуускайтан ини-бии Мигалкиннар: ССРС бэчээтин туйгуна, Мүрү нэһилиэгин бочуоттаах гражданина Зоя Васильевна, СӨ үөрэҕириитин туйгуна, «Алаас» кинигэ кыһатын үлэһитэ Мария Васильевна, СӨ норуотун хаһаайыстыбатын үтүөлээх үлэһитэ, М.К. Аммосов аатынан СӨ судаарыстыбаннай бириэмийэтин лауреата, Уус Алдан улууһун бочуоттаах гражданина Афанасий Васильевич, СӨ култууратын уонна доруобуйа харыстабылын туйгуна, быраас Михаил Васильевич уонна «Чолбон» сурунаалтан СӨ бэчээтин уонна култууратын туйгуна, суруйааччы Уйбаан Ойуур  кыттыыны ыланнар тэрээһини улаханнык сэргэхситтилэр.

Ааптардар бэйэлэрин дакылааттарын, айымньыларын сүрдэрэ көтөҕүллэн туран аахтылар, айымньыларын быыстапкатын көрдөрдүлэр. Түмүккэ «Мигалкиннар дьиэ кэргэннэрэ» тиэмэҕэ Чараҥ орто оскуолатын 6-с кылааһын үөрэнээччитэ Альберт Федосеев (салайааччы В.А. Соркомова), араатардар куонкурустарыгар Мүрүтээҕи уолаттар гимназияларын 7-с кылааһын үөрэнээччитэ Айсен Бочкарев бастаатылар. Хомуурунньуктарга тахсыбыт хоһооннору ааҕыы күрэҕэр Уһун Күөл орто оскуолатын 2-с кылааһын үөрэнээччитэ Вика Григорьева (салайааччы Е.Д. Сивцева), Чараҥ орто оскуолатын 9-с кылааһын үөрэнээччитэ Ванесса Федорова (салайааччы С.М. Атастырова) уонна Мүрү орто оскуолатын хамаандата (салайааччы И.И. Никонов) эрэллээхтик кыайаннар үөрдүлэр-көттүлэр.

Кэлбит ыалдьыттар бэйэлэрин айар үлэлэрин туһунан кылгастык кэпсээтилэр, кэмпириэнсийэ кыттыылаахтарыгар анаан сүбэ-ама биэрдилэр. Норуодунай бэйиэт Иван Мигалкин саха литэрэтиирэтэ сайдарын туһугар дьаныһан дьарыктаныы ирдэнэрин ыйда.

Иван ОСИПОВ, «Саха сирэ» хаһыат, edersaas.ru

Ааптар түһэриилэрэ.

+1
0
+1
0
+1
0
+1
0
+1
0
+1
0
+1
0